Hơdôm hrơi rơgao, adơi Vũ Trần Tiến Đạt, hrăm anih 5 Sang hră gưl sa Nguyễn Thị Định, să Ia R’vê, hăng ƀing gơyut ñu nao đă boh lông ƀơi lan sang gah anăp sang hră. Gah anăp anun lĕ Sang hră kơnuk kơna čem rông pơƀut dua gưl hrăm să Ia R’vê arăng pơkra ƀiă či giong laih, dŏ glăi glông sang đih pit, ƀong huă, sang bơkjăp drơi jăn, sang pơđok hră....Đạt tlao hok biă mă yua dah thun hrăm phrâo 2026-2027 pơ anăp, ñu hăng ƀing gơyut dưi mut hrăm, ƀong huă, đih pit amăng sang hră phrâo: “Ƀing nai hăng amĭ ama kâo lăi mơ̆ng thun hrăm pơ anăp, kâo mut hrăm pơ sang hră kơnuk kơna čem rông să Ia R’vê anai laih. Kâo mơak biă, tơdah dưi mut hrăm pơ anun. Pơ anun, ƀing nai lăng ba ƀing gơmơi, mơ̆ng ƀong huă, pit đih laih anun hơmâo anih ngui bơkjăp rơjang drơi jăn dong. Hrơi năm hrơi tơjuh gơmơi glăi čuă sang anŏ. Kâo gir hrăm mơtăm yơh. Bruă kâo kiăng ngă tơdơi anai lĕ jing sa čô mơnuih rơgơi đă boh lông”.

Bơ adơi Nông Thị Thùy, čơđai hrăm anih 7 Sang hră gưl dua Trần Hưng Đạo, să Ia Lốp brơi thâo, Sang hră kơnuk kơna čem rông pơƀut lu gưl hrăm să Ia Lốp hơmâo man pơdong kiăo tui bruă pơmut hrŏm Sang hră gưl sa Nguyễn Trãi hăng Sang hră gưl dua Trần Hưng Đạo. Yua hnun, thun hrăm pơ anăp, ñu amra hrăm hră, dŏ dong ƀong huă pơ anun hlao. Lơ̆m ƀiă či truh hrơi mut hrăm sang hră phrâo, hơmâo djŏp anŏ klă, hiam, ñu lăi: “Kâo mơak biă mă yua hơmâo hrăm pơ sang hră kơnuk kơna čem rông anai, yua dah sang kâo ataih mơ̆ng sang hră truh 15km. Amăng sang hră hơmâo gơyut gơyâo, ƀing nai, hơmâo sang đih pit gah ƀing đah kơmơi hiam biă. Kâo gir prăk rơmet mă kâo, hrăm mă kâo mơn. Tơdơi anai kâo hor ngă nai pơtô. Kâo amra gir yơh, kiăng hrăm thâo, jing nai pơtô čơđai, tơdơi anai pơwơ̆t glăi pơ guai dêh čar anai mơn či pơtô brơi ƀing čơđai dong”.

Tơring čar Dak Lăk hơmâo 4 boh să pơ guai dêh čar hơmâo Ea Bung, Ia R’vê, Ia Lốp hăng Buôn Hồ. Hơdôm boh să leng kơ hơmâo kual lŏn prong, ană plơi aset, dŏ raih daih, lu plơi pla ataih mơ̆ng sang să truh kơ hơdôm pluh km. Amai Vi Thị Nhiều, ƀơi plơi Làng thanh niên lập nghiệp, să Ia Lốp brơi thâo: Sang anŏ ñu hơmâo dua čô ană glăk hrăm anih 8 hăng anih 6. Sang ataih mơ̆ng sang hră giăm 20km, anun yơh bruă ba ană bă nao hrăm glêh biă. Bruă ană bă ñu dưi nao hrăm pơ sang hră kơnuk kơna čem rông jing sang anŏ ñu hơđong pran jua laih: “Lơ̆m ană bă hơmâo nao hrăm, dŏ dong ƀong huă ƀơi sang hră hiam, prong, hơmâo djŏp gơnam yua kah hăng hơmâo anih ƀong huă, đih pit tui anun jing kâo hơ’et pran laih. anai jing sang hră djru brơi ană bă dưi thâo djŏp mơta, mơ̆ng tơlơi hrăm hră truh kơ kjăp drơi jăn. Jing mơnuih ngă amĭ tui hăng kâo, jing mơak biă yơh, yua dah huăi ba nao ană bă pơ sang hră tui hăng mơ̆ng hlâo dong tah, laih anun huăi bơngơ̆t či wai lăng gơñu dong tah. Hrơi kŏm lĕ gơñu glăi ngui pơ sang, mơak yơh djơh anun”.

Thun 2025-2027, tơring čar Dak Lăk man pơdong 4 boh sang hră kơnuk kơna čem rông pơƀut dua gưl hrăm ƀơi hơdôm boh să pơ guai hăng plơi pla tơnap tap. Amăng anun, hơdôm boh sang hră ƀơi Ia R’vê, Ia Lốp, hăng Buôn Đôn amra ba mă yua amăng thun hrăm phrâo 2026-2027, čơkă năng ai 3.100 čô čơđai mơ̆ng anih 1 truh pơ anih 9, hăng năng ai 2/3 čô čơđai hrăm hră, ƀong huă amăng sang hră.

Ơi Hồ Sĩ Cát, Khua sang hră kơnuk kơna čem rông pơƀut dua gưl Ia R’vê (să Ia R’vê), brơi thâo, sang hră hơmâo ngă giong laih bruă ruah 910 čô čơđai mơ̆ng 3 boh sang hră, anun lĕ: Sang hră gưl sa, gưl dua Chu Văn An, Sang hră gưl dua Nguyễn Thị Định hăng Sang hră gưl sa Nguyễn Đình Chiểu. Laih dong, sang hră glăk prăp rơmet djŏp nai pơtô, mơnuih mă bruă, pô wai lăng čơđai hăng anih hơtuk rơyă tơnă hơbai, dưi čơkă čơđai sang hră amăng thun hrăm phrâo 2026-2027: “Lơ̆m ƀing čơđai mut hrăm sang hră phrâo baih, jing bruă wai lăng ƀing čơđai mơ̆ng mơguah truh mơmot huăi bơngơ̆t hơget dong tah, hơđong pran jua či nao pơ hmua. Amĭ ama ƀing čơđai huăi bơngơ̆t asơi huă añăm ƀong yang hrơi dong, tlam nao tŭ čơđai, brơi gơñu ƀong huă dong tah. Abih bang čơđai hrăm pơ sang hră kơnuk kơna čem rông leng kơ hơmâo djru ba prăk ƀong huă, sum ao, hră čih, hră pơhlom nua ia jrao yua Kơnuk kơna djru brơi”.

Hơdôm boh sang hră pơ guai dêh čar ƀơi Dap Kơdư ƀu kơnong pok rai tơlơi gêh găl hrăm hră klă hloh ôh ăt djru brơi ƀing čơđai dưi ngă bruă gơñu hor tơdơi anai, brơi ƀing čơđai pơ guai prong tơlơi pơmin, kjăp pran jua, kiăng tơdơi anai glăi djru kơ plơi pla pơ guai dêh čar dong mơn./.