Nai prin tha GS.TS Nguyễn Xuân Thắng, Khua Sang hră kơđi čar dêh čar djă anăn Hồ Chí Minh, Khua khul čih tơlơi pơtô djơ̆ Ping gah nao pơhmư̆ hăng pơhiăp git gai mông Jơnum. Kơ-iăng khua mir sir yă Võ Thị Ánh Xuân - Kơ-iăng khua tal sa Khul bơkơtưn apah bơni mơ̆ng Gơnong dlông; hrŏm hăng 193 čô mơnuih jing mơnuih rơgơi mơbruă bơkơtưn khăp kơ lŏn ia rơwang thun 2020-2025 mơ̆ng Sang hră pơtô bruă Kơđi čar dêh čar wơ̆t hăng hơdôm boh sang hră kơđi čar tơring čar, ƀôn prong nao pơhmư̆.

Pơhiăp git gai mông jơnum hăng pơphun bruă bơkơtưn rơwang thun 2025-2030, GS.TS Nguyễn Xuân Thắng kiăng ngă klă bruă kơdi čar hơmâo jao, git gai hơdôm khul grup mơnuih mơnam amăng Sang hră ăt kah hăng hơdôm boh sang hră kơđi čar tơring čar, ƀôn prong kiăng pơtrut tui gru grua bơkơtưn đưm hlâo, pran kơtang mơ̆ng abih bang hăng tơlơi pơmin “Gum pơgôp - Ngă pô - Tui tơlơi phiăn - Pơplih prong - Đĭ kyar” ngă klă bruă “Bơkơtưn gum pơgôp, pơčeh phrâo ba Sang hră pơtô bruă Kơđi čar dêh čar Hồ Chí Minh hrŏm hăng dêh čar ta mut amăng rơnuk pơplih phrâo./.