VOV4.Jarai - Mơguah lơ 17/3, ƀơi tơring glông Krông Pač - Dak Lăk, Anom bruă djă pioh tơlơi rơgơi (Ding jum Boh thâo ia rơgơi) ngă hrŏm hăng Jơnum min mơnuih ƀon sang tơring čar Dak Lăk pơphun brơi hră pơsit anăn gơnam “Sầu riêng Krông Pač”. Krông Pač jing sa kual pla sầu riêng lu hloh mơng tơring čar Dak Lăk, hăng rơbêh 2.500 ektar, mrô gơnam pơhrui glăi rim thun him lăng hơmâo mơng 45.000 truh kơ 50.000 tơn, prăk pơhrui mơng 2.200 truh 2.400 klai prăk. Bruă hơmâo pơsit anăn gơnam jing djru mơnuih pla, anom bơwih ƀong pơđĭ kyar anŏ klă, gơnam hơmâo anăn, hmư̆ hing hloh ƀơi anih sĭ mơdrô.

Khua git gai Ping gah tơring glông Krông Pač ơi Trần Hồng Chiến brơi thâo, djŏp anom bruă glăk ngă hrŏm hăng mơnuih ƀon sang, anom bơwih ƀong amăng ƀrư̆ngă pơgiong hră pơ-ar pơkŏn dong kiăng sầu riêng Krông Pač jing gơnam sĭ mơdrô hơmâo hră kĭ pơkôl blơi mut, dưi ba sĭ kơ čar rơngiao kah hăng ƀơi Japan, Hàn Quốc, Úc, Mi, ƀudah EU.

Siu H’Mai: Pơblang