VOV4.Jarai - Mơguah (25/8), ƀơi plơi prong Thanh Hoá, hăng hrơi mông yôm phăn, giang mah amăng thun gum pơgôp giang mah Việt Nam - Lao, Lao - Việt Nam thun 2022, tơring čar Thanh Hóa pơphun yôm tal hơdor glăi 60 thun hrơi akŏ pơjing bruă pơtom hiăp Việt Nam - Lao, 45 thun hrơi kĭ tơlơi pơkôl ngă giang mah hăng ngă hrŏm Việt Nam - Lao, 55 thun hrơi kĭ hră ngă hrŏm giang mah Thanh Hoá - Hủa Phăn.

Nao ngă lơphet hơmâo ƀing khua mua, anom bruă pơtom hiăp 2 boh dêh čar Việt Nam - Lao; khua mua glăk mă bruă, hăng khua mua hơđăp 2 boh tơring čar Thanh Hoá (Việt Nam) hăng Hủa Phăn (Lao), hrŏm hăng ƀing apăn bruă Ping gah, mơnuih ƀon sang, mơnuih mă bruă, ling tơhan, ƀing čơđai sang hră. Đĭ pơhiăp amăng mông ngă lơphet, ơi Đỗ Trọng Hưng, Khua git gai Ping gah tơring čar Thanh Hóa lăi pơtŏng: Việt Nam hăng Lao lĕ dua boh dêh čar ha guai, ia krông čroh hnoh rô nao rai, mơñum hrŏm ia krông Mê kông, gơnang nao čư̆ Trường Sơn hing ang, mơnuih ƀon sang dua bơnah hơmâo lu tơlơi bơkơnar amăng gru grua, hơmâo pran khăp pap, giang mah, pơjing tơlơi rô nao rai mut hrŏm, pơlir hơbit amăng sui thun ayun blan.

Siu Đoan: Pơblang