Mơguah hrơi anai, lơ 20/12, ƀơi Sang jơnum prong dêh čar ƀơi plơi prong jưh jom Hà Nội, Khul apăn bruă Ping gah Cộng sản Việt Nam, Khua pơ ala mơnuih ƀôn sang dêh čar, Khua mir sir dêh čar Việt Nam, Jơnum min djop djuai ania mơnuih mơnam Việt Nam hăng Ping gah ling tơhan, Ding jum ling tơhan pơphun yôm phăn yôm pioh hơdor glăi 80 thun hrơi akŏ pơjing ling tơhan mơnuih ƀôn sang Việt Nam, 35 thun hrơi jơnum ngui abih bang wai pơhgang rơnuk rơnua lŏn ia.

Nao ngă lơphet hơmâo ƀing khua mua pơprong, khua mua hơđăp mơng Ping gah, Kơnuk kơna, ling tơhan, ƀing khua tơhan hơđăp, amĭ Việt Nam sông kơtang, khua  tơhan amăng djop rơnuk. Tơlơi yôm pơdah amăng mông ngă lơphet pioh hơdor glăi lĕ Jơlan hơdră ngui adôh hri gru grua glông rơbêh 30 mơnit, hơmâo hơdôm črăn hơdră adôh suang yôm phara, pơdah glăi abih bang gru grua akŏ pơjing, blah ngă, blah dưi mơng Ling tơhan kah hăng pơsit tong tơlơi gơgrong prong mơng Ling tơhan mơnuih ƀôn sang Việt Nam amăng bruă pơjing hăng wai pơgang lŏn ia. Anăp nao hrơi pioh hơdor anai, amăng hrơi blan rơgao amăng đơ đam dêh čar hơmâo lu bruă mă sit nik. Đơ đam dêh čar hơmâo rơbêh 1.830 ring bruă pioh hơdor, nua ñu giăm 260 klai prăk; pok pơhai djru brơi prăk kak kiăng pơkra ming pra yang brơi 32 čô tơhan Việt Nam pơtô pơblang pơklaih rơngai, hăng nua prăk 2,56 klai prăk.