VOV4.Jarai-Ăt amăng hơdră mă bruă jơnum lok 14, mơguah lơ 11/8, gah yŭ tơlơi git gai mơ̆ng ơi Vương Đình Huệ, Khua git gai pơ ala mơnuih ƀôn sang dêh čar, 100% ding kơna Jơnum min apăn bruă phun pơ ala mơnuih ƀôn sang dêh čar ƀuh ƀô̆ mơta tŭ ư pơsit hĭ 2 Hră pơtrun kơ bruă: Akŏ pơdong tơring kual ƀudah plơi phun Bình Phú, tơring glông Cai Lậy, tơring čar Tiền Giang; akŏ pơdong plơi prong Chơn Thành hăng akŏ pơdong hơdôm boh phường să amăng plơi prong Chơn Thành, tơring čar Bình Phước.  

Tŭ ư pơsit 2 Hră pơtrun, samơ̆ Jơnum min apăn bruă phun pơ ala mơnuih ƀôn sang dêh čar rơkâo, hăng plơi prong Chơn Thành kiăng lăi pơthâo tong ten sang bruă, bruă mă kơđi čar amăng plơi prong khom ngă djơ̆ hăng Hră pơtrun mơ̆ng anom bruă khua pơ ala mơnuih ƀôn sang dêh čar.

Lơ̆m hlăk ngă tui Hră pơtrun mrô 06 mơ̆ng Ding jum kơđi čar kơ tơlơi phiăn man pơdong hăng pơđĭ kyar hơđong kjăp plơi prong, ƀôn prong amăng Việt Nam truh thun 2030, lăng nao pơ anăp adih thun 2045, Jơnum min apăn bruă phun pơ ala mơnuih ƀôn sang dêh čar rơkâo Kơnuk kơna sem glăi abih bang djop tơring glông amăng dêh čar, tơring glông pơpă aka ƀu hơmâo tơring kual plơi phun tơring glông khom čih anăn, hơmâo akŏ bruă tuh pơ alin djru ba tơring glông anun ngă giong hră pơar lăi pơthâo Jơnum min apăn bruă phun pơ ala mơnuih ƀôn sang dêh čar, kiăng tañ ngă giong abih bang djop tơring glông amăng dêh čar hơmâo tơring kual plơi phun soh.

Nay Jek: Pơblang