VOV4.Jarai - Ƀơi Dak Lăk, mut hun hrăm phrâo ăt hơmâo mơn hơdôm pluh čô čơđai sang hră gưl anet prong mơng dêh čar Lao tui hrăm pơ dêh čar ta. Thun hrăm anai, hơmâo giăm 60 čô čơđai sang hră Lao glăk hrăm ƀơi hơdôm boh sang hră ƀơi Dak Lăk. Hăng tơlơi lăng ba mơng gong gai hăng anom bruă kơnuk kơna, sang hră, ƀing čơđai glăk gir hrăm kiăng truh anih, dưi ngă bruă gơñu hor.  

Čơđai sang hră Thidphaphone Duangphachanh (25 thun, plơi ñu pơ tơring čar Attapeu, dêh čar Lao) glăk hrăm bruă ia jrao, sang hră Đại học Tây Nguyên (plơi prong Buôn Ma Thuột, Dak Lăk) brơi thâo: mơng rơnuč thun 2017, ñu tui hrăm bruă ia jrao Y Đa Khoa hơmâo arăng djru prăk hrăm abih bang. Giăm 6 thun hrăm ƀơi anai, găn rơgao tơnap tap, pha pơ plơi pla, phara tơlơi phiăn, tơlơi pơhiăp, hơmâo tơlơi djru ba mơng sang hră, nai pơtô hăng ƀing gơyut, Thidphaphone dưi hrăm pơ sang hră phrâo, ñu hrăm rơgơi mơn, ƀiă truh hrơi ngă ơi ia jrao tui hăng ñu hor laih.

“Ruah hrăm bruă ia jrao yua kơ hor mơn, hrăm kiăng kơ thâo, djru lăng ba tơlơi suaih pral, pơjrao tơlơi ruă. Hrăm ia jrao tơnap ƀơ̆i yơh, samơ̆ tơnap gah tơlơi pơhiăp hloh dong, tơlơi pơhiăp gah bruă ia jrao ñu phara mơn, kiăng hrăm lu biă mă. Kâo pơmin amra glăi pơ dêh čar Lao mă bruă, djru brơi ană plơi pla”.

Čơđai sang hră Thidphaphone Duangphachanh glăk hrăm pơ Sang hră Đại học Tây Nguyên.

Bơ adơi Chansida Inthakhong (18 thun, plơi ñu pơ tơring čar Sê Kông, dêh čar Lao) glăk hrăm ƀơi Sang hră gưl 3 kual Dap Kơdư čem rông ană bă djuai ƀiă (gah Ding jum ling tơhan) plơi prong Buôn Ma Thuột brơi thâo: giăm 4 thun ƀơi Dak Lăk, ñu juăt laih hăng tơlơi hơdip ƀơi sang hră tui gru ling tơhan.

“Dŏ hơdip pơ sang hră ta kiăo tui tơlơi pơkă, gru grua mơng ling tơhan mơn, hrơi mông ngă bruă arăng pơkă khŏp. Hlâo adih tơnap mơn, samơ̆ hơmâo sang hră lăng ba, djru ba bruă hrăm, ƀong huă, tlâ̆o vaccine lơ̆m hơmâo Covid-19. Hăng pô kâo jing mơnuih ataih mơng sang anŏ, rai hrăm pơ Việt Nam, sang hră kar hăng sang anŏ kâo mơn, hơmâo lăng ba ta, gơyut gơyâo hai klă mơn, juăt djru ba kâo amăng djŏp bruă”.

Ngă tui bruă pơtruh giăng mah, ngă hrŏm amăng bruă mă kơplah wah Dak Lăk hăng hơdôm boh tơring čar Dơnung dêh čar Lao, mơng thun 2018 truh ră anai, hơmâo laih hơdôm rơtuh čô čơđai sang hră Lao rai hrăm pơ Sang hră Đại học Tây Nguyên hăng Sang hră gưl 3 Dap Kơdư čem rông ană bă djuai ƀiă glăk hrăm tui lu prăk djru phara. Amăng mông hrăm hră, ƀing čơđai sang hră Lao hơmâo djru brơi anih dŏ đôč, brơi prăk rim blan, ngui ngor Tê̆t Bunpimay mơng mơnuih ƀon sang Lao ƀơi Buôn Đôn, pơbưp ƀing čơđai hrăm hră Lao hơđăp hrăm ƀơi Dak Lăk.

Ơi Nguyễn Ngọc Phan, Khua sang hră gưl 3 čem rông ană bă mơnuih djuai ƀiă Dap Kơdư brơi thâo, thun hrăm anai, sang hră hơmâo 45 čô čơđai sang hră Lao glăk tui hrăm. Hrŏm hăng prăk djru mơng kơnuk kơna, sang hră ăt iâu pơthưr abih bang mơnuih gum djru đah mơng pơđĭ tui bruă pơtô hrăm brơi ƀing čơđai.

“Abih bang prăk pioh pơtô hrăm lêng kơ yua sang hră, mơng ƀing khua sang hră, nai pơtô gum djru pơđĭ kyar kual člah klâo ăt kah hăng tơlơi rô nao rai dua boh dêh čar. Amăng hrơi blan pơ anăp, gơmơi amra gir hrŏm hăng tơring čar Sê Kông ăt kah hăng tơring čar Dơnung dêh čar Lao pơjing tơlơi gêh gal, pơđĭ kyar amăng bruă pơtô hrăm jai hrơi klă hloh”.

Khul giăng mah Việt Nam - Lao ƀơi Dak Lăk ƀơk gơnam kơ čơđai sang hră Lao glăk hrăm ƀơi Sang hră gưl 3 čem rông ană bă djuai ƀiă kual Dap Kơdư.

Tui hăng ơi Lê Văn Nghĩa, Khua khul ngă giăng mah Việt Nam - Lao tơring čar Dak Lăk, pơtrut đĭ tơlơi rô nao rai klă hiam, pơlir hơbit kơplah wah 2 boh dêh čar Việt Nam - Lao, Dak Lăk pơsit sa amăng hơdôm bruă yôm phun lĕ bruă pơtô brơi čơđai sang hră dêh čar Lao glăk hrăm ƀơi tơring čar. Khul ngă hrŏm giăng mah Dak Lăk hơmâo ngă hrŏm, djru wai lăng bruă pơtô pơjuăt, djru brơi klă hloh kơ giăm 60 čô čơđai sang hră Lao glăk hrăm ƀơi hơdôm boh sang hră či Dak Lăk. Pơtrut tui hơdôm boh than hơmâo ngă, 2 Khul amăng tơring čar amra ngă rơđah tui Hră kĭ pơkôl anai, pơkra rai hơdră ngă bruă rơđah rơđông kơ dua bơnah. Pôr pơthâo nao rai tơlơi pơhing, ngă hrŏm kơjăp amăng bruă pơtô hră, brơi čơđai sang hră nao rai hrăm pơ dua boh dêh čar.

“Ƀing ta djru ba, ngă gal brơi mơng ană mơnuih, anih anom, djru brơi amăng bruă pơtô pơjuăt, pơtŏp brơi ƀing čơđai sang hră Lao hrăm ƀơi tơring čar. Gơmơi rơkâo laih Khua mua Ping gah, git gai bruă jơnum giăng mah kơplah wah mơnuih ƀon sang Dak Lăk hăng čơđai sang hră, mơng anun brơi čơđai hơmâo sang anŏ, anih hơdip jê̆ giăm, mơ-ak ƀơi Dak Lăk, djă pioh gru rgua hăng djru kiăng čơđai sang hră hơđong pran jua hrăm hră. Gơmơi amra jak iâu abih bang mơnuih gum djru đah mơng dưi ngă tui hră pơkôl ngă bruă mơng 2 khul ƀơi Dak Lăk hăng Sê Kông. Dua Khul tơring čar amra krăp lăng tŭ yua bruă čem rông, lăng ba, pơtô hrăm mơng sang hră gưl 3 čem rông ană bă djuai ƀiă Dap Kơdư (Ding jum Ling tơhan) hăng Sang hră Đại học Tây Nguyên hăng ƀing čơđai sang hră gưl anet, prong mơng dêh čar Lao glăk tui hrăm ƀơi 2 boh sang hră”.

Thun hrăm phrâo 2022-2023 truh laih. Hrŏm hăng čơđai sang hră Việt Nam, ƀing čơđai mơng dêh čar Lao glăk hrăm ƀơi Dak Lăk ăt glăk hrăm hră tui bruă gơñu hor, gir hrăm hră đah mơng glăi djru ngă pơdrong asah, klă hiam kơ plơi pla gơñu./.

H’Xíu: Čih - Siu H’Mai: Pơblang