VOV4.Jarai - Lơ 7/6, Ƀirô tơhan polih pel ĕp kơđi tơlơi Ding jum kông ang hmâo ba tơbiă tơlơi pơsit tơgŭ kơđi, mă pơkŏng Khua hơđăp Ding jum  ia jrao dêh čar ta ơi Nguyễn Thanh Long, Khua hơđăp Jơnum min mơnuih ƀôn sang ƀôn prong Hà Nội Chu Ngọc Anh hăng Kơ-iăng Khua hơđăp Ding jum kơsem min boh thâo hăng hơdră phrâo măi mok Phạm Công Tạc kiăng pel ĕp hơdôm tơlơi ngă soh bơdjơ̆ nao kơđi tơlơi Sang bruă Việt Á pơđĭ mă ča nua kit pơčrang lăng kơman Covid-19. Hlâo kơ anun, mơguah lơ 7/6, Khua pơ ala mơnuih ƀôn sang dêh čar ta hmâo pơsit pel ĕp Tơlơi pơtrun pơsit mơng Khua pơ ala mơnuih ƀôn sang kơ brơi pơdơi bruă apăn Khua pơ ala mơniuh ƀôn sang tal 15 hăng ơi Nguyễn Thanh Long, Grŭp Khua pơ ala mơnuih ƀôn sang tơring čar Vĩnh Long hăng hluai tui Tơlơi pơtrun pơsit mơng Khua pơ ala mơnuih pơsit tơlơi rơkâo mơng Khua dêh čar kơ bruă brơi pơdơi bruă apăn hăng Khua ding jum ia jrao rơwang bruă 2021-2026. Khul pơ ala mơnuih ƀôn sang ƀôn prong Hà Nội tal 16 ăt hmâo pơsit mơn brơi pơdơi bruă apăn Khua Jơnum min mơnuih ƀôn sang ƀôn prong Hà Nội tal 16, rơwang bruă 2021-2026 hăng ơi Chu Ngọc Anh. Ƀơi anăp tơlơi anai, lu khua pơ ala mơnuih ƀôn sang lăi lĕ, anai lĕ tơlơi kiăng lăng glăi pran jua mơnuih apăn bruă hăng sa wot dong brơi ƀuh bruă pơgang, pơgăn hưp ƀong kông ngăn, tơlơi ƀu klă “ƀu hmâo kual kom, ƀu hmâo tơlơi pơkă pha ra, khă pô anun hlơi ñu”./.

Siu H’ Prăk: Pơblang