VOV4.Jarai - Mơguah lơ 7/4, ƀơi tơring čar Ninh Thuận, dua bôh tơring čar Lâm Đồng hăng Ninh Thuận kĭ pơkôl Jơlan hơdră gum hrom pơđĭ kyar bruă tuai čuă ngui rơwang 2022-2025, amăng anun hmâo tô nao rai plơi prong bơnga Đà Lạt hăng kual ia rơsĭ tuai čuă ngui Ninh Chữ. Amăng jơlan hơdră gum hrom pơđĭ kyar tuai čuă ngui Ninh Thuận hăng Lâm Đồng rơwang 2022-2025, 2 tơring čar bơkơtuai nao rai, gum pơhiăp pơdŏng anih anom tuai čuă lăng mơng rim bơnah; pơjing hăng pơđĭ kyar lu mơta hơdôm anih anom tuai čuă lăng, tô nao rai hơdôm anih anom pioh pơhư̆č tuai čuă ngui. Ninh Thuận hmâo tơhnal gal tuai čuă ngui prong hăng hơdôm anih anom tuai čuă lăng pha ra mơng kual ia rơsĭ, čư̆ siăng dlai tlô hăng bôh thâo đưm mơng neh wa djuai ania Čăm, Raglai. Bơ̆ Lâm Đồng lĕ hmâo anô̆ gal gah anih anom tuai čuă lăng pha ra biă hăng ayuh hyiăng rơ-ơ̆ hăng tơlơi pơdơi pơdă klă. Hrom hăng anun, jơlan tô Ninh Thuận – Lâm Đồng ăt jing sa anih tuai čuă ngui. Dua tơring čar amra tañ pơdŏng tuor tuai čuă ngui “sa jơlan nao 3 anih anom” lĕ Đà Lạt – Phan Rang – Nha Trang, čơkă tuai ƀơi tơdron rơdêh por Liên Khương hăng ba glăi tuai pơ̆ tơdron rơdêh por Cam Ranh, hrom hăng hơdôm anih anom tuai čuă ngui pha ra kiăng ngă pơhư̆č hăng pơhrư̆i sui hrơi dô̆ glăi mơng tuai čuă ngui./.

Siu H’ Prăk: Pơblang