Sang hră čơđai mua Krông Bông, să Krông Bông, tơring čar Dak Lak tơdơi kơ pơmut hrŏm hơmâo 1 anih phun, 2 anih pơdong phara hăng 3 anih pơkŏn dong hăng 515 čơđai kiăo tui hrăm. Bruă pioh glăi čơđai, nai pơtô ƀơi hơdôm boh sang hră hơđăp kiăng huăi ngă luk puk, samơ̆ ba tơbiă tơlơi rơkâo amăng wai lăng sa boh sang hră amăng kual prong ƀiă, ƀing čơđai dŏ hrăm raih daih. Yă Lê Thị Thúy Nga, Khua sang hră lăi pơthâo: “Sang tơnă hơbai ƀơi anih pơdong Măng Non amra djru brơi gơnam ƀong kơ 2 anih pơkŏn, yua anun amra pơdŭ pơgiăng gơnam ƀong nao pơ anih pơtô phara. Sang hră Họa Mi, sang tơnă hơbai amra djru brơi gơnam ƀong kơ 1 sang hră pơdong phara hăng 2 boh sang hră pơkŏn, yua anun ăt bưp tơnap tap amăng bruă pơdŭ hyu gơnam ƀing kơ ƀing čơđai, prăk yua lĕ prăk pơgôp mơng amĭ ama čơđai.”

Lơm sa boh sang hră dưm pơmut hrŏm hơmâo lu anih pơtô phara, bruă wai lăng, pơphun bruă pơtô hrăm ƀu djơ̆ kơnong tui jơlan hơdră pơtô mơng sang hră phun. Ƀơi sang hră gưl I Nguyễn Du, phương Tân Lập, tơring čar Dak Lak, bruă dưm dăp mơnuih djru Khul hlăk ai ƀơi hơdôm boh sang hră lĕ tơlơi pơhmutu. Yă Nguyễn Thị Hương, Khua sang hră brơi thâo, ră anai khŏm pơpha nai ngă dua mơta bruă phara. “Bruă prong hloh mơng hơdôm boh sang hră ră anai lĕ kơƀah ƀing neh nai djru bruă phara kiăng djru brơi hơdôm bruă mă amăng sang hră ƀơi hơdôm anih pơdong phara mơ̆ kiăng thâo rơgơi, thâo mă bruă. Ră anai hơdôm boh sang hră glăk dưm dăp mơnuih mă bruă jang jai, anai lĕ khŏm pơhrua ƀing nai pơtô tơlơi hrăm anai ƀudah nai sang hră gưl I ngă bruă. Sit biă ñu kiăng hơmâo sa čô nai djru bruă sang hră ăt aka hơmâo ôh. Wŏt nai pơtô adôh suang ngă bruă anai ăt aka ƀu djơ̆ hăng tơlơi rơkâo lơi.”

Tơdơi kơ pơmut dua gưl hơmâo gưl I hăng II, Sang hră gưl I-gưl II Quang Trung, să Krông Bông, tơring čar Dak Lak hơmâo djop 19 anih hrăm samơ̆ dŏ kơƀah anih yua pơkŏn, anih hrăm tơlơi hrăm sit nik. Ơi Nguyễn Viết Bá Hoàng, Khua sang hră brơi thâo, mah sang hră hơmâo jao pơhrua dong anih hrăm ƀơi sa, dua anih hơđăp kiăng pok prong, samơ̆ ăt aka ƀu djơ̆ tơlơi rơkâo. “Abih bang anih mă bruă ƀơi Jơnum min mơnuih ƀon sang să ră anai ƀing gơmơi yua ngă anih anom mă bruă soh. Tơdah hơmâo prăk ƀudah hơmâo tơlơi črâo trun kiăng ngă hiưm pă, anun ƀing gơmơi amra ruh hĭ sang hơđăp kiăng man pơdong sang phrâo. Mơ ră anai tơdah ƀu hơmâo lŏn ƀơi Anom bruă Jơnum min mơnuih ƀon sang să hơđăp ƀing gơmơi ăt ƀu thâo ngă hiưm pă lơi. Ră anai ƀing gơmơi ƀu hơmâo anih pơtô bơrơguăt drơi jăn phara.”

Hrŏm hăng hơdôm bruă sui pơ anăp, bruă pơplih hơdai nao hơbô̆ bruă phrâo ăt dŏ bơdjơ̆ nao lu tơlơi gun ngă hră pơ-ar ƀơi anăp. Sa, dua boh sang hră kiăng ngă hră pơ-ar bơdjơ̆ nao kơ mrô duh jia, mrô pơsit anăn khul grup hăng kru đŏm dong. Bruă kaih pơgiong djop hră pơ-ar anai bơdjơ̆ nao bruă mă, bruă prăk kak hăng hơdôm bruă amăng sang hră. Yă Bùi Lan Anh-Khua sang hră gưl II Nguyễn Chí Thanh, phương Tân Lập lăi nao tơlơi sit nik anai: “Sang hră gơmơi lĕ sang hră Trần Bình Trọng pơmut hrŏm hăng Nguyễn Chí Thanh jing sang hră Nguyễn Chí Thanh. Sang boh sang hră phrâo akŏ pơjing kiăng hơmâo mrô duh jia phrâo hăng mrô pơsit brơi anih anom phrâo. Kông ang ăt rơkâo tui anun mơn, dua boh sang hră hơđăp kiăng duh prăk jia hăng ngă glăi mrô anih phrâo, lơm anun kông ang kah brơi ƀing gơmơi pơkra kru đŏm phrâo. Samơ̆ truh ha mơkrah blan laih ƀing gơmơi nô̆p pơkra kru đŏm, hăng hơmâo ngă bruă hăng anom bruă bơdjơ̆ nao amăng hrơi blan rơgao.”

Ƀing ta amra ƀuh, tơdơi kơ pơmut hrŏm hơdôm boh sang hră tơlơi kiăng ngă mơng gơnong bruă pơtô pơjuăt Dak Lak ƀu djơ̆ kơnong dưm dăp glăi sang hră đôč ôh mơ̆ kiăng jŭ yap djop ngăn rơnoh brơi rĭm boh sang hră, rĭm anih pơdong phara; laih dong pơsir hĭ bruă kơƀah mơnuih mă bruă, anih yua phara, gơnam măi mok djru brơi bruă pơtô hrăm. Hrŏ ƀiă anih wai lăng anai lĕ boh than ba glăi mơng bruă dưm dăp. Boh tŭ yua sit nik lơm ngă bruă anai amra pơdah amăng rơwang pơ anăp, lơm hơdôm boh sang hră phrâo pok pơhai hơđong, ngă klă amăng pơtô hrăm hăng ƀing čơđai ƀơi hơdôm anih hrăm phara lêng kơ dưi tŭ mă djop tơlơi gal amăng pơtô hrăm./.