VOV4.Jarai-Hrom hăng amăng dêh čar ta, khua mua, ling tơhan blah ngă pơgang jơlan guai dêh čar mơ̆ng tơring čar Dak Nông ăt dik dăk prăp lui mơak čơkă thun phrâo. Samơ̆ tơlơi mơak čơkă thun phrâo gơñu ăt ƀu wor rơbit ôh bruă djă phao kơtuang pơgang lŏn ia, tơlơi rơnuk rơnua hơđong ƀơi guai dêh čar.

Tơlơi mơak čơkă thun phrâo Nhâm Dần 2022 hlăk dik dăk yơh ƀơi kual glai klô giăm guai dêh čar či Dak Nông, ia iom bơnga blang amăng bơyan bơyan phang lăng hyu bă hră amăng kual anih puih tơhan pơgang guai dêh čar dŏ pơbŭk hiam biă mă. Hăng ƀing khua, ling tơhan, Puih kơđông lĕ sang, guai dêh čar lĕ plơi pla, ƀong tết pơ puih kơđông ăt kah pơ sang anŏ, hơmâo ƀañ čưng ƀañ tek djop mơ̆n, hơmâo asơi añăm mơnong, boh troh; hơmâo bơnga đao, bơnga dar laih anun hơmâo tơlơi mơak čơkă thun phrâo hok kơdok.

Thun tal blung a čơkă thun phrâo ƀơi guai dêh čar, tơhan thun tal sa Binh nhất Lầu Văn Hiện, Grup tơhan blah ngă, Puih kơđông tơhan pơgang guai dêh čar Dak Tiên, gah sang bruă khua tơhan pơgang guai dêh čar tơring čar Dak Nông brơi thâo, hơmâo tơlơi gleng nao mơ̆ng khua mua juh  alum, pơtrut pran jua brơi prăp rơmet tong ten amăng Puih kơđông kiăng abih bang čơkă thun phrâo, ƀong tết hok mơak, trơi đao, glăm ba bruă mă pơgang lŏn čar ƀơi guai dêh čar:

‘’Thun anai, jing thun tal blung a kâo ƀong tết ƀơi guai dêh čar. Ƀing adơi ayong amăng puih kơđông tơhan mơak biă abih bang lăng kah hăng adơi ayong sa boh sang, lăng ba djru nao rai tơdruă kiăng plai ƀiă hning glăi pơ sang anŏ. Kâo mơak biă mă laih anun ư pơ ang mơ̆n yua dưi mut ngă tơhan. Thun phrâo, kiăng mơ-it hiăp pơpŭ kơ sang anŏ, gơyut gơyâo, phung wang sa tơlơi pơpŭ thun phrâo hiam drơi jăn hăng rơnuk rơnua mơak klă’’.

Mơ̆ng tơngan rơgơi kơhnăk amăng bruă mă, ƀing khua mua, ling tơhan pơgang guai dêh čar, anung pơkra rai hơdôm tơlô̆ ƀañ tek ƀañ čưng hiam, jơman pioh ƀong ngui ngor amăng hơdôm hrơi čơkă thun phrâo. Gơnam ƀong pơkŏn, pơkra mă pô, pơjing mă soh, kah hăng añam pơtam pla mă pô, un mơnŭ rông mă mơ̆n, djop mơta mơnong ƀong huă lêng kơ mơnong ƀong huă rơgoh hơdjă soh bơwih brơi kơ hrơi ngă yang thun phrâo djuai ania. Thiếu tá Lương Văn Phú, Kơ-iăng khua djru bruă kơđi čar puih kơđông tơhan pơgang guai dêh čar Dak Tiên, gah sang bruă khua tơhan pơgang guai dêh čar tơring čar Dak Nông brơi thâo, puih kơđông gơñu ngă klă bruă pơtô lăi kjăp tơlơi pơmin kơ ƀing khua mua, ling tơhan kiăng hơđong dŏ glăi mơak ƀong tết:

‘’Hăng pran jua mơ̆ng abih bang ling tơhan ră anai hok mơak soh, laih anun prăp lui djop mơta mơnong ƀong huă kiăng čơkă thun phrâo. Ƀing gơmơi pơtong glăi laih kjăp tơlơi pơmin, ngă tui djop bruă jao khom giong’’.

Ăt kah hăng lu tal ƀong tết pơkŏn mơ̆n, têt thun Nhâm Dần 2022 anai mơ̆ng ling tơhan pơgang guai dêh čar tơring čar Dak Nông, hrom hăng asơi añăm tơnă brơi kơ tơhan, laih anun pơđing hmư̆ djop tơlơi tơpư̆ hlư̆ amăng kual guai dêh čar, amra kơsung nao mơtam ngă bruă jao. Jai jê̆ hrơi truh tết, bruă mă hyu tir, rơbat hyu amăng glai klô sem lăng khom ngă tui tong ten biă mă. Djop bruă mă pơgang jơlan guai dêh čar, pơgang tơlơi dưi ngă pô kơ lŏn ia pơphun na nao re se ƀu pơdơi ôh.

Mrô tơhan dŏ glăi mă bruă pơgang jơlan guai dêh čar khom djop mrô pơkă na nao. Bruă sem lăng ĕp mơnuih găn rơgao nao rai ƀơi jơlan guai dêh čar, rơdêh mơnuih ƀôn sang găn rơgao nao rai, dưi ngă klă, wai lăng kjăp, ĕp lăng gong tơmeh pơkă guai dêh čar laih anun bruă ngă pơhlôm pơgang klin Covid 19, ngă tui tŭ yua. Trung tá Nguyễn Huy Hiếu, Khua puih kơđông tơhan pơgang guai dêh čar Dak Tiên, tơring čar Dak Nông brơi thâo:

‘’Dưi hơmâo ping gah, kơnuk kơna, mơnuih ƀôn sang jao brơi bruă mă wai pơgang guai dêh čar, gơmơi rơkâo ƀuăn ngă djơ̆ bruă pơtrun, pơpha bruă sem lăng wai pơgang kjăp jơlan guai dêh čar, anih dŏ ƀơi giăm guai dêh čar, kiăng thâo tong ten tơlơi pơhing, ngă hrom lu tơhan pơkŏn pơkơdong glăi hăng ƀing soh sat, kiăng ngă giong bruă jao amăng hơdôm hrơi ƀong tết čơkă thun phrâo djuai ania’’.

Tơring čar Dak Nông hơmâo jơlan guai dêh čar glông ataih năng ai 141 km, găn rơgao 7 boh să giăm guai dêh čar ƀơi tơring glông Čư̆ Jŭt, Dak Mil, Dak Song hăng Tuy Đức. Ƀơi djop plơi pla 7 boh să guai dêh čar anai akŏ pơjing khul wai lăng amăng plơi pla, djru wai pơgang gong tơmeh pơkă guai dêh čar soh. Hơdôm thun rơgao, biă mă ñu amăng hơdôm hrơi ƀong tết, ngă hrom lu tơhan pơgang guai dêh čar, ngă hrom mơnuih ƀôn sang pel ĕp, pơgăn mơnuih mut tơbiă, găn rơgao nao rai ƀơi jơlan guai dêh čar, pơgăn ƀing soh sat mut rai amăng guai dêh čar.

Đại tá Nguyễn Văn Lư, Khua git gai tơhan pơgang guai dêh čar tơring čar Dak Nông brơi thâo, hrom hăng bruă akŏ pơjing tơdron blah amăng pran jua mơnuih ƀôn sangm tơhan pơgang guai dêh čar dŏ ngă klă bruă pơtom hiăp pơgang guai dêh čar. Biă mă ñu, amăng hrơi blan klin kheng Covid 19 hlăk ƀă hyu tơnap tap, bruă pơtom hiăp gah tơhan pơgang guai dêh čar hơmâo hơdră pơblih bruă mă brơi djơ̆ găl, tŭ yua. Mơ̆ng anun, djru hrom pơđĭ tui tơlơi gum pơgôp giăng mah gơyut gơyâo dua boh lŏn ia, pơgang hơđong tơlơi rơnuk rơnua guai dêh čar:

‘’Amăng hrơi blan hơmâo klin kheng gơmơi pơblih hơdră, tơlơi mă bruă pơtom hiăp, ƀu bưp ƀơi anăp mơta ôh, kơnong mơ-it hră, pơhiăp telephôn hăng ƀuăn bưp nao rai ƀơi jơlan guai dêh čar. Ƀuh rơđah, hăng hơdră pơblih ngă bruă tui anun, gơmơi ăt ngă tui na nao mơ̆n bruă pơtom hiăp pioh lăi pơthâo tơlơi pơhing hăng bruă ngă hrom wai lăng, pơgang tơlơi dưi ngă khua pô lŏn ia laih anun pơgang tơlơi rơnuk rơnua ƀơi guai dêh čar’’.

Tơlơi mă bruă hur har, prăp lui hlâo ngă bruă pơgang guai lŏn ia mơ̆ng tơhan pơgang guai lŏn ia ƀơi Dak Nông hlăk ngă laih anun ngă tui, djru hrom yom biă mă pơgang tơlơi hơđong, rơnuk rơnua mơnuih mơnam ƀơi kual guai dêh čar. Biă mă ñu amăng bơyan têt anai, tơlơi hơđong kjăp mơ̆ng adơi ayong ling tơhan amra ba glăi tơlơi rơnuk rơnua hơđong kơ mơnuih ƀôn sang mơak thun phrâo djuai ania.

Công Bắc pô čih-Nay Jek: pơblang