VOV4.Jarai - Tlam lơ 21/8, tơlơi lăi pơthâo mơng Anom bruă git gai tơhan pơgang guai tơring čar  Kon Tum brơi thâo, ling tơhan hơmâo ngă hrŏm hăng tơhan pơgang guai Tây Ninh djru pơklaih brơi sa čô dra 16 thun ƀơi să Đăk Xú, tơring glông Ngọc Hồi, tơring čar Kon Tum hơmâo arăng plư sĭ pơ dêh čar Kur, arăng lăi brơi ñu ngă kông ñơn mă bruă huăi glêh ôh, samơ̆ prăk blan lu. Tui tơlơi Y Liên lăi pơthâo hăng tơhan pơgang guai lĕ pô anăn Lê Ngọc Nhất ñu thâo tui glông facebook sĭ ñu pơ kông ti blung a hăng nua prăk 1.800 dolar, tơdơi kơ anun Y Liên hơmâo sĭ kơ kông ti pơkŏn dong. Yua arăng pơgô̆ ñu mă bruă kơtang đơi, jing Y Liên rơkâo pơdơi bruă glăi pơ Việt Nam samơ̆ kông ti kiăng duh 3.500 dolar ƀudah plư hơmâo mơng 3 truh kơ 5 čô mơnuih dong nao ngă bruă brơi kông ti gơñu kah mơng brơi glăi pơ dêh čar. Bưng hĭ mơn, Y Liên hơmâo tơhan pơgang guai Kon Tum hăng Tây Ninh djru brơi.

Y Liên hơmâo djru ba glăi pơ Việt Nam tui bah amăng jăng Jar kmar Mộc Bài, Tây Ninh.

Tơdơi kơ hơmâo djru, tlam lơ 20/8/2022, Y Liên hơmâo tơhan pơgang guai Kon Tum hăng Tây Ninh ba glăi pơ Việt Nam tui amăng jang Jar kmar Mộc Bài, Tây Ninh hăng pơwơ̆t glăi hăng sang anŏ ñu pơ Kon Tum.

Siu H’Mai: Pơblang