VOV4.Jarai-Hrom hăng bruă ngă hơkrŭ, pơkơdong glăi ƀing soh sat, ƀing tơhan pơlih blah ngă gah anom bruă tơhan kông an tơring čar Dak Lak pơphun re se glăi pơ kual plơi pla, djru ană plơi pla amăng bruă mă, ngă hmua, pĕ boh troh đang hmua.  Bruă ngă anai, djru ngă pơhiam kơnuih tơlơi jĕ giăm plah wah ling tơhan kông an mơnuih ƀôn sang hăng mơnuih ƀôn sang djop plơi pla.

Ƀơi ƀôn Ktơ̆ng Drun, să Čư̆ Nĕ, tơring glông Krông Ƀŭk, Dak Lak, 30 čô tơhan kông an mơnuih ƀôn sang djru hrom pơrơgoh hnoh ia rô hăng jah rơ̆k mrơ̆k,  pơkra glăi pin ia. Thượng úy Nguyễn Thị Khánh Vân, Kơ-iăng Khua git gai khul glăk ai mut phung anom bruă Tơhan pơlih blah ngă mơ̆ng Kông an tơring čar Dak Lak brơi thâo, hơdôm wơ̆t tơhan rŭi glăi pơ plơi pla djru  mơnuih ƀôn sang, pơphun lu wơ̆t kiăng djru mơnuih ƀôn sang amăng djop plơi pla sit nik.

“Anai lĕ sa amăng hơdôm bruă mă mơ̆ ƀing gơmơi ba pran jua hlăk ai, tơlơi gir run djru plơi pla, ba bruă mă mơ̆ng tơhan kông an mơnuih ƀôn sang, tơhan pơlih blah ngă nao pơ kual ataih, kual tơnap tap djru mơnuih ƀôn sang amăng bruă mă”.

Tal anai, ƀing tơhan hơmâo djru kuăi pơrơgoh hnoh ia rô, king hmua, jah rơ̆k mrơ̆k akiăng jơlan hăng kih rơmet lan sang ƀơi sang jơnum plơi ƀôn Đrao hăng ƀôn Ktơ̆ng Drun, să Čư̆ Nĕ; hrom bruă pơtô pơblang tơlơi phiăn laih anun pơtum pran jua mă bruă ƀơk 50 anung gơnam kơ hơdôm sang anŏ tơnap tap.

Hơdôm hơpluh čô tơhan pơlih blah ngă djru kuăi hnoh ia king hmua

Tui hăng ơi Y Bliu Mlô, Kơ-iăng Khua Jơnum min djop djuai ania mơnuih mơnam să Čư̆ Nĕ lăi, anai lĕ dua boh plơi tơnap tap hloh amăng să, hơmâo 500 boh sang anŏ, hăng 2000 čô mơnuih ƀôn sangm lêng kơ djuai ania Êđê soh dŏ. Hơmâo tơlơi djru, kah pơpha brơi hmao kru mơ̆ng ƀing khua  mua, ling tơhan kông an djru kiăng ană plơi pla plai ƀiă tơnap tap, gir run hrưn đĭ amăng bruă mă.

“Tơlơi hơdip mơda mơnuih ƀôn sang lăi hrom dŏ ngă hmua kơdư, tơnap tap biă mă. Tal rai ƀơk gơnam anai, kiăng ană plơi pla gir run hloh ngă hmua, pla pơjing. Pơ ala kơ mơnuih ƀôn sang amăng dua boh plơi, ƀuh tơlơi anai mơak, bơni lu hăng čang rơmang hơmâo na nao bruă mă djru ba djơh hăng anai, boh nik ñu amăng tơnap tap ră anai”.

Hăng rĭm čô tơhan pơlih blah ngă, rĭm wơ̆t hyu mă bruă amăng plơi pla jing sa tơlơi gêh găl pioh gơñu dưi glăi pơ plơi pla, thâo hluh, jĕ giăm hăng mơnuih ƀôn sang, ƀư̆ pơkra pran jua ai hơtai, tơlơi thâo thăi jĕ giăm pơtô lăi mơnuih ƀôn sang. Trun sĩ Y Sen Mdrang lăi:

“Laih hyu ngă bruă tui anai, gơmơi akŏ pơjing tơlơi rô nao rai jĕ giăm mơak hăng ană plơi pla, lir hơbit laih anun djru kah pơpha  amăng bruă mă bơwih ƀong huă, hơdip mơda mơnuih bobon sang. Hyu bưp mơnuih ƀôn sang ƀuh hơđong hloh, mơak tui, kiăng djru ană plơi pla hăng abih pran jua ta pô, jing sa čô tơhan hlăk ai djru ană plơi pla”.

Thiếu tá Hoàng Thị Kim Phượng, Khua grup kơđi čar čem rông tơhan, Anom bruă tơhan pơlih blah ngă brơi thâo, ngă tui bruă jak iâu pơtrun mơ̆ng Kông an tơring čar Dak Lak anăp glăi pơ kual plơi pla, akŏ pơjing tơlơi jĕ giăm rô nao rai mơak hăng ană plơi pla, rĭm thun anom bruă hơmâo anăp glăi pơ kual plơi pla, pơyơr pran jua djru kual plơi pla. Rĭm wơ̆t nao amăng plơi pla abih sa wơ̆t hrơi tơjuh, ƀing tơhan pơlih amra glăi akŏ pơjing anih dŏ amăng plơi pla, djru mă bruă hăng ană plơi pla.

Tơhan pơlih blah ngă ƀơk gơnam kơ mơnuih ƀôn sang tơnap tap

Kah hăng thun 2021, mah tơlơi pơhing klin kheng Covid 19 tơnap tap hai, anom bruă ăt pơphun 7 wơ̆t glăi mă bruă djru ană plơi pla, jak iâu pơčruh hơmâo truh 320 klăk prăk blơi gơnam djru kơ ană plơi pla. Kơnong mơ̆ng akŏ thun truh ră anai, anom bruă pơphun 5 wơ̆t mă bruă glăi pơ plơi pla kual ataih, tơnap tap.

“Pơtong rơđah bruă yôm akŏ pơdong tơlơi jĕ giăm gum pơgôp hăng ling tơhan laih anun mơnuih ƀôn sang amăng tơring čar, rĭm thun anom bruă tơhan pơlih blah ngă hơmâo git gai ƀing khua mua, ling tơhan pok pơhai bruă mă djru  ană plơi, pơyơr pran jua glăi djru mă bruă, gum ană plơi, biă mă ñu mơnuih ƀôn sang djuai ƀiă, kual ataih tơnap tap. Mơ̆ng bruă mă anun, pioh glăi kơ ƀing khua mua, ling tơhan ƀing gơmơi ƀuh tơlơi tơnap tap, gleh glăr mơ̆ng mơnuih ƀôn sang hăng sa črăn bruă pơpă thơ kiăng djru ba pơtrut pơblih tơlơi hơdip mơda, bơwih ƀong huă kơ mơnuih ƀôn sang”.

Hlâo kơ anun, 50 čô khua mua, ling tơhan Tơhan pơlih blah ngă,  kông an tơring čar Dak Lak ăt hơmâo ngă tui bruă anăn “Bruă mă pơyơr pran jua” ƀơi să Yang Tao, tơring glông Lak. Hrom hăng pơphun bruă hyu sem lăng, pơgang tơlơi rơnuk rơnua mơnuih mơnam, hơđong plơi pla, tơhan pơlih dŏ pơtô lăi mơnuih ƀôn sang ngă djơ̆ tơlơi phiăn, jơlan hơdră Ping gah, kơnuk kơna hăng tơlơi pơtrun mơ̆ng tơring čar.

Pơ anai, ƀing tơhan pơlih blah ngă hơmâo djru kih rơmet jơlan glông nao rai amăng plơi pla; nao tơl hmua pơdai pioh djru yuă pơdai mơnuih ƀôn sang.

Amăng hrơi blan ƀiă đôč hyu djru mơnuih ƀôn sang amăng plơi pla, ƀing khua mua hăng ling tơhan pơlih blah ngă mơ̆ng kông an tơring čar Dak Lak ƀu kơdun ôh hăng tơlơi tơnap tap kiăng djru hrom mơnuih ƀôn sang amăng kual plơi pla, boh nik ñu djru mơnuih ƀôn sang  djuai ƀiă dŏ tơnap tap lu mơta.

Rĭm wơ̆t glăi pơ plơi pla tui anun, ƀing tơhan pơlih blah ngă mơ̆ng kông an Dak Lak hơmâo djru hrom pơgang tơlơi rơnuk rơnua hơđong, ngă kjăp tui tơlơi khăp mơ̆ng mơnuih ƀôn sang hăng ling tơhan, akŏ pơjing rup rap hiam, lăp hơdor pioh kơnuih klă kơ tơhan pơlih, tơhan kông an  mơnuih ƀôn sang “Yua kơ lŏn ia wor drơi jăn pô, yua kơ mơnuih ƀôn sang khom mă bruă”.

                                                                                     H’Xíu pô čih-Nay Jek:Pơblang