Ngă lơphet 70 thun hrơi blah dưi Điện Biên Phủ jing bruă jơnum prong biă mơ̆ng Ping gah, mơnuih ƀôn sang hăng ling tơhan kiăng pơtô lăi dlăm kơ tơlơi yôm, tơlơi kơdrưh kơ-ang mơ̆ng gru grua blah dưi hmư̆ hing pơčah rơyah 5 kual lŏn, tơtar lŏn tơnah. Tui hăng akŏ bruă, hrơi ngă lơphet pơƀuh kơdrưh tơhan, rơbat pơtrui amăng bruă ngă Lơphet amra pơphun amăng lơ 7/5/2024 ƀơi tơdron bơrơguăt drơi jăn tơring čar Điện Biên hơmâo lu khul tơhan gum hrŏm kah hăng: Ling tơhan, Tơhan mơnuih ƀôn sang pơgang mă pô, Kông an, mơnuih ƀôn sang...Hrŏm hăng anun lĕ ƀing tơhan dŏ dong ƀơi lan.

Ƀơi mông ngă lơphet tơhan rơbat pơtrui him lăng amra hơmâo 9 boh rơdêh bek djă hla gru Ping gah, hla gru Lŏn ia por nao gah gong kut ngă lơphet; 4 grup Tơhan pơgang ƀing khua; 24 grup tơhan blah ngă; 9 grup tơhan mơnuih ƀôn sang hăng tơhan rơbat pơtrui hiam djơ̆ mơta lăng.