Ơ ơi pang yă dôn, abih bang mơnuih ƀôn sang, khua mua apăn bruă hăng ling tơhan amăng dêh čar ta khăp ƀu-eng !

Amăng mông mơnit pơblih thun sô rơgao thun phrâo truh, hok mơak hrom čơkă thun phrâo Nhâm Dần, pơ ala kơ khua mua Ping gah, Kơnuk kơna lŏn ia hăng Jơnum min djop djuai ania mơnuih mơnam Việt Nam, rơkâo mơ-it kơ ơi pang yă dôn, mơnuih ƀôn sang, ƀing apăn bruă khua mua hăng ling tơhan amăng dêh čar, hrom hăng mơnuih ƀôn sang djuai ania ta dŏ pơ dêh čar tač rơngiao hăng tơlơi bơni hơơč pơpŭ thun phrâo hăng tơlơi khăp prong, hơmâo lu tơlơi mơak prong prin hloh amăng thun phrâo. Kâo ăt rơkâo mơ-it hiăp pơpŭ kơ gơyut gơyâo djop dêh čar, amăng djop kual ƀơi rŏng lŏn tơnah, mơnuih ƀôn sang djop dêh čar hăng tơlơi pơpŭ rơnuk rơnua, hiam klă, giăng mah gơyâo hyuk hyak mơak mơai.

Hơdor glăi amăng bơyan phang thun phrâo Nhâm Ngọ 1942, amăng hră pơhing phrâo “Việt Nam Độc lập”, Khua mir sir Hồ Chí Minh hơmâo čih :

“Pơpŭ kơ dêh čar ta amăng thun anai

 Hla kơ mriah, pơtŭ kơñĭ por đhơ đhet!

Thun anai lĕ thun Tết hing ang

Tơlơi pơpŭ  mơ̆ng Wa truh ră anai krep buă 80 thun. Mah gru phun dêh čar pơblih nao bơnah hla phrâo laih, samơ̆ bruă ngă pơpŭ đĭ kơ gru phun djuai ania, pran jua gum pơgôp, tơlơi khăp pap prong, hơđong kjăp, khin hơtai mơ̆ng mơnuih ƀôn sang ta ăt ƀu thâo pơblih ôh.

Thun 2021, amăng hrơi mông khă lông lăng prong, ƀing ta ƀuh hơmâo lu rup rap hiam klă, gru mơnuih pơyơr pran jua yua tơlơi khăp, tuh rơyuh pran jua yua kơ ană plơi pla mơ̆ng djop gưl mơnuih ƀôn sang: Anun lĕ ƀing ơi ia jrao, nai ia jrao, ƀing khua mua, ling tơhan, ƀing tơdăm dra, mơnuih pơyơr pran jua ƀu kơdun ôh hăng tơlơi hŭi rơhyưt amăng kual hơmâo klin, lui pưk sang đang hmua, lui sang anŏ, amĭ ama, ană bă pơ sang; ƀing tha rơma djă ba abih prăk pơkôm lui mơ̆ng pô nao pơčruh hrom hăng keh prăk pioh djru kơ bruă pơhlôm, pơgang klin Covid 19; ƀing ană amôn tơdăm ngek dra muai hơmâo kač đĭ jing rup rap hiam kiăng bơni, čih tơlơi pơtưh, čih hră mơ-it pơđok dlưh pran jua biă mă, kiăng pơdah rai tơlơi khăp, tơlơi kiăng hăng ƀing ơi ia jrao, nai ia jrao, ăt kah hăng tơlơi đăo kơnang kơ pran kơtang Việt Nam amăng tơlơi lông lăng klin kheng prong ngă.

Amăng mông mơnit anai, hơmâo ană mơnuih Việt Nam hlăk dŏ pơ anih mă bruă pơgang klin, ƀing ling tơhan hrơi mlam pơgang tơlơi rơnuk rơnua, wai lăng jơlan guai dêh čar, bul pơtâo plao ia rơsĭ dêh čar ƀudah ƀing  adơi amai lu anom bruă ăt dŏ greh gruñ mă bruă ƀu dưi glăi čơkă thun phrâo ƀong tết mơak hăng sang anŏ ôh.

Ping gah kơnuk kơna hăng mơnuih ƀôn sang pơpŭ biă mă tơlơi gir run kơ bruă mă, tơlơi glăm ba mơ̆ng mơnuih ƀôn sang hăng mơnuih mơnam amăng dêh čar ta. Lŏn ia čih pioh hơdor na nao tơlơi pơsăn drơi jăn mơ̆ng ană plơi, mơ̆ng ƀing apăn bruă, ling tơhan, bơni lu kơ pran jua yua kơ lŏn ia mơ̆ng mơnuih ƀôn sang djuai ania ta pơ dêh čar tač rơngiao laih anun tơlơi gum djru mơ̆ng gơyut gơyâo jar kmar.

Yua mơ̆ng tơlơi lông lăng anun jai pơhrăm lu kơ ƀing ta pran jua kơtang hloh mơ̆ng tơlơi khăp gum pơgôp sa pran jua ai hơtai, mơ̆ng tơlơi pơmin hăng pran jua kjăp kơtang, tơlơi lăp hăng pran jua sa čô tơhan khin hơtai hrup hăng ơi yă met neh adơi ayong anong wa ƀing hơmâo ngă laih đưm đă “mơguah bong glăi rơbŭ kơthel, tlam pơgang pơđiă hang apui”, găn rơgao hơdôm rơbâo thun akŏ pơjing lŏn ia, man pơdong hăng pơgang dêh čar.

Pơpŭ kơ abih bang djop sang anŏ Việt Nam khăp ƀu-eng hơmâo hơdôm hrơi Tết mơak mơai, trơi pơđao hăng rơnuk rơnua. Pơpŭ kơ rĭm čô mơnuih ƀôn sang Việt Nam, mơnuih ƀôn sang djuai ania ta thun phrâo Nhâm Dần 2022 hiam drơi jăn pran jua, rơnuk rơnua, mă bruă tŭ yua hăng hyuk hyak mơak klă.

Bơni kơ abih bang laih anun pơpŭ mơak thun phrâo !

Khua mir sir Nguyễn Xuân Phúc