Jơnum yua Khua ding jum kơčăo bruă hăng tuh pơ alin Việt Nam Nguyễn Chí Dũng hăng Khua dung jum sĭ mơdrô hăng tuai čuă ngui Australia Don Farrell git gai hrŏm. Amăng mông jơnum, dua čô khua ding jum pơlăi nao rai kiăng ba tơbiă hơdôm hơdră pơtrut kơtang tơlơi rô nao rai bơwih ƀong Việt Nam-Australia. laih dong lăng yôm bruă ngă tui hơdră kơtưn ngă hrŏm bơwih ƀong hăng boh tơhnal mơng jơnum hơdôm grup mă bruă kơ ODA, FDI hăng sĭ mơdrô.

Laih dong, đing tơnga hmư̆ tơlơi pơgôp, rơkâo đĭ mơng anom bơwih ƀong sĭ mơdrô ba jơlan hlâo mơng Việt Nam hăng Australia kiăng pơtrut bruă bơwih ƀong sĭ mơdrô pơđĭ kyar hơđong kjăp. Laih dong, dua bơnah pơčrông sai bruă ngă hrŏm dua bơnah amăng hơdôm tal jơnum djop bơnah hăng amăng kual anun lĕ ASEAN, APEC, WTO, RCEP, CPTPP. Jơnum pok rai hơdôm jơlan pơđĭ kyar phrâo amăng tơlơi rô nao rai bơwih ƀong Việt Nam-Australia.