VOV4.Jarai - Tuai čuă lăng hluai tui kơ ayuh hyiăng klă, anih anom Đang bơnga lŏn drŏn đơ đam rŏng lŏn tơnah UNESCO Daknông lĕ sa amăng 3 jơlan phun mơng bruă bơwih ƀong tơring čar Daknông. Yua anun yơh, lom pơdŏng Đang bơnga lŏn drŏn đơ đam rŏng lŏn tơnah UNESCO Daknông, hmâo pơjing 3 jơlan glông tuai čuă ngui tui rim anăn ñu, anun lĕ:  “Trường ca của nước và lửa”, “Bản giao hưởng của sự đổi thay” hăng “Âm vang từ trái đất”. Amăng 3 jơlan dlông anun, tuai čuă ngui amra truh hăng gru grua bôh thâo đưm lu mơta hăng pha ra mơng khul mơnuih rơbêh kơ 40 djuai ania adơi ayong.

Ƀon Pi Nao, să Nhân Đạo, tơring glông Dăk R’lấp lĕ sa amăng 10 bôh plơi, ƀôn dưi hmâo Jơnum min mơnuih ƀôn sang tơring čar Daknông ruah ngă anih tuai čuă lăng plơi pla. Yua kơ anih anom anai dô̆ djă pioh đôč hơdôm gru bôh thâo pha ra mơng djuai ania Bơnông. Hơdră anai kiăng djru kơ tuai čuă lăng lom hơduah ĕp Đang bơnga lŏn drŏn đơ đam rŏng lŏn tơnah UNESCO Daknông găn rơgao lăng hơdôm nua yôm bôh thâo đưm mơng djuai ania ƀiă ƀơi anai. Kiăo tui anun, gơnong bruă gơgrong gah tơlơi anai amra pơdŏng Grŭp pơtô ba anih anom dô̆ glăi, ƀong huă; Grŭp mơnuih pơdah atông čing hơgor, adôh suang, adôh tơlơi adôh đưm; Grŭp mơnuih rơngaih mơñam băn ao, bung bai, kŏng tơpai... Ơi Điểu K’Bang – Khua ƀôn Pi Nao mơ-ak lom thâo tơlơi pơhing anai.

“Amăng ƀon Pi Nao ƀing gơmơi hmâo hơdră pơtrun mơng tơring čar Daknông lĕ ngă bruă tuai čuă lăng plơi pla. Ƀing adơi amai amăng ƀon kâo hmâo pơdŏng laih Anom mă bruă hrom rơngaih mơñam băn ao kiăng djă pioh gru grua phiăn juăt đưm. Ră anai, hmâo sa Grŭp mă bruă hrom pioh pơjing bruă mă kơ ƀing adơi amai hmâo dong prăk pơhrui glăi kơ sang anô̆. Hrom hăng anun, mơng anun ăt dưi djă pioh dong gru grua phiăn juăt, bôh thâo đưm klă hiam mơng djuai ania Bơnông pô”.

Bơkơtuai bôh thâo phrâo “Pơdŏng hơdră pơđĭ kyar tuai čuă ngui plơi pla pơkĕ hăng hơdôm nua yôm pha ra mơng  Đang bơnga lŏn drŏn đơ đam rŏng lŏn tơnah tơring čar Daknông – Tơlơi ră anai hăng jơlan pơsir”

Glông jơlan čuă ngui “Trường ca của nước và lửa” amăng glông jơlan hơduah ĕp Đang bơnga lŏn drŏn đơ đam rŏng lŏn tơnah UNESCO Daknông, tuai pơphun mơng plơi prong Gia Nghĩa nao pơ̆ Krông Nô – Anih hmâo amăng drŏng čư̆ apui kơdir prong hloh Đông Nam Á. Amăng anun, anih pơdơi tơkai mơ-ak ăt lĕ plơi pla djuai ania Bơnông hăng hơdôm nua yôm bôh thâo đưm, gru grua sui thun. Anun jing “Anih ngă hơkrŭ Nâm Nung”. Ƀơi anai ăt dưi hmâo Gơnong bruă bôh thâo, bơkơjăp drơi jăn hăng tuai čuă ngui tơring čar Daknông ruah ngă pơphô hlâo anih tuai čuă lăng plơi pla.

Djuai ania Bơnông ƀơi să Nâm Nung mơ-ak biă lom hmư̆ plơi pla giăm či jing kual tuai čuă lăng. Yua anun, tuai amăng lŏn ia hăng dêh čar tač rơngiao amra thâo hluh hơdôm nua yôm bôh thâo đưm pha ra mơng djuai ania pô. Hăng ăt mơng anun mơn, neh wa amra hơdip hăng bruă wai lăng tuai čuă ngui – bơwih kơ tuai. Kiăng tui anun, tui hăng amai H’ Thuynh ƀơi ƀon R’Cập, să Nâm Nung, tơring glông Krông Nô, kiăng hrăm bruă, kiăng rim mơnuih ƀôn sang lĕ sa čô mơnuih pơtô brơi kơ tuai čuă lăng.

“Ƀơi ƀon ƀing gơmơi ăt hmâo mơn lu mơnuih thâo rơngaih mơñam, atông čing hơgor, adôh tơlơi adôh đưm. Tơdah hmâo anih pơtô glăi, kâo kiăng hrăm pioh thâo hăng lăi pơthâo kơ tuai čuă lăng thâo hluh kơ bôh thâo đưm phiăn juăt mơng djuai ania pô. Mơng anun tuai amăng lŏn ia ta hăng dêh čar tač rơngiao thâo kơ gru grua bôh thâo đưm ƀơi ƀon pô. Kâo čang rơmang hmâo sa anih hrăm tui anun kiăng djop mơnuih thâo pioh lăi pơthâo glăi gru grua bôh thâo phiăn juăt djuai ania Bơnông pô”.

Gru grua bôh thâo amăng Đang bơnga lŏn drŏn Daknông

Yă Tôn Thị Ngọc Hạnh – Kơ-iăng Khua Jơnum min mơnuih ƀôn sang tơring čar Daknông brơi thâo, lom Đang bơnga lŏn drŏn Daknông dưi mut hrom amăng đơ đam rŏng lŏn tơnah, hmâo laih lu mơnuih tuh pơplai đing nao. Gơnong bruă gơgrong gah tơlơi anai ƀơi tơring čar hmâo hăng glăk hmâo lu bruă mă kiăng pơgang hơdôm nua bôh thâo pha ra mơng 40 djuai ania adơi ayong, anun lĕ gơnam, anih anom tuai čuă lăng pha ra ha jăn.

“Thâo kơ tơlơi kiăng tañ hăng tơhnal yôm phăn amăng bruă pơgang, ngă tui nua yôm gru grua amăng kual Đang bơnga lŏn drŏn Daknông, hơdôm hrơi rơgao, Grŭp wai lăng Đang bơnga lŏn drŏn Daknông hmâo gum hrom laih hăng hơdôm bôh anom gơnong bruă hăng hơdôm plơi pla kiăng pok pơhai lu tal lăi pơhing, pơhrăm brơi tơlơi thâo thăi kơ gru grua lŏn drŏn hăng Đang bơnga lŏn drŏn, hơdră pơgang, ngă tui nua yôm gru grua truh hăng mơnuih ƀôn sang, biă ñu ƀing hlăk ai čơđai tơdăm ngek dra muai. Grŭp wai lăng ăt gum hrom mơn hăng Gơnong bruă pơtô pơhrăm, Grŭp hlăk ai kiăng pơhrua hrom hơdôm bôh yôm lăi pơhing anai amăng hơdôm mơta tơlơi hrăm, hơdôm bruă pơtô pơhrăm djơ̆ kiăng pơđĭ tui bôh thâo kơ čơđai sang hră hơdôm gưl. Mơng anun, pơjing tơlơi ư-ang hăng pơđĭ tui tơlơi pơmin pơgang, rơnăk hơdôm nua yôm gru grua plơi pla”.

Blan 10 thun 2021 phrâo rơgao, Anom pơtô bruă kơđi čar Hồ Chí Minh dêh čar ta hmâo pơphun Bơkơtuai bôh thâo phrâo “Pơdŏng hơdră pơđĭ kyar tuai čuă ngui plơi pla pơkĕ hăng hơdôm nua yôm pha ra mơng  Đang bơnga lŏn drŏn đơ đam rŏng lŏn tơnah Daknông – Tơlơi ră anai hăng jơlan pơsir”. Bruă bơkơtuai pơsit: Bruă kơsem min pơdŏng hơdră pơđĭ kyar tuai čuă ngui plơi pla pơkĕ hăng hơdôm nua yôm pha ra mơng Đang bơnga lŏn drŏn đơ đam rŏng lŏn tơnah tơring čar Daknông hluai tui tơlơi pơkă pơgang hăng pơlar kơjăp, djru pơđĭ kyar bơwih ƀong – mơnuih mơnam tơring čar lĕ tơlơi dưi ba tơbiă kiăng biă. Amăng jơlan hơdră hyu mă bruă mơng Grŭp apăn bruă Ping gah tơring čar Daknông amăng thun 2021 phrâo rơgao ăt pơsit mơn: Pơlar bruă tuai čuă ngui pơkĕ hăng Đang bơnga lŏn drŏn đơ đam rŏng lŏn tơnah UNESCO Daknông rơwang mơng thun 2021-2025 lĕ sa amăng hơdôm bôh yôm kiăng ngă tui Tơlơi pơsit Jơnum Khua pơ ala Ping gah tơring čar tal 12./.

Quốc Học: Čih – Siu H’ Prăk: Pơblang