Ơi K’Ních, khua ƀuôn Dur 1, să Dur Kmăl, tơring glông Krông Ana, tơring čar Dak Lak, ol kơdol pran jua hăng pơ-ư ang lơm dưi bưp Khua git gai Ping gah dêh čar ơi Nguyễn Phú Trọng amăng Hrơi ngui gum pơgôp djop djuai ania thun 2018. Ñu ƀuh jê̆ giăm biă mă mơng pran hơdip mơng khua git gai prong hloh mơng Ping gah hăng mơnuih ƀôn sang.

“Dưi hmư̆ hăng bưp ƀơi anăp amăng hrơi anun, kâo ƀuh wa lĕ mơnuih hmač, jê̆ giăm kar hăng ƀing ama kiăng khăp amăng sang anŏ. Wa lêng pơtă abih bang mơnuih apăn bruă hăng neh met wa kiăng gum pơgôp kjăp phik, thâo pơsir hĭ hơdôm bruă aka ƀu klă kiăng gum hrŏm pơđĭ kyar. Mơng anun truh ră anai găn rơgao 5 thun laih, mơng tơlơi pơtă mơng wa, neh met wa hơmâo ngă tui klă hloh”.

Ăt hơmâo bưp Khua git gai Ping gah dêh čar ơi Nguyễn Phú Trọng 2 wŏt amăng hơdôm hrơi jơnum ngui gru grua, mơnuih čih boh pia Niê Thanh Mai, Khua khul čih boh pia tơring čar Dak lak hơdor glăi hơdôm boh pơhiăp mơng Khua git gai Ping gah kơ pran gum pơgôp. Yă Niê Thanh Mai brơi thâo, hơdôm tơlơi git gai mơng Khua git gai Ping gah dêh čar amăng Jơnum đơ đam dêh čar kơ gru grua thun 2021 hơmâo tơring čar Dak lak pok pơhai ngă tui.

“Gum pơgôp djop djuai ania amăng čih boh pia, tơlơi adôh suang hăng hluai tui boh pia, tơlơi adôh suang, ƀing gơmơi dưi pơjing hơdôm jơlan hơdră, akŏ bruă amăng hơdôm tơlơi ngă sen, adôh suang brơi ƀing ngui adôh suang; ngă hiưm pă ƀuh rơđah tơlơi gơgrong hăng pran gum pơgôp mơng djop djuai ania hăng sit biă ñu lĕ pran gum pơgôp; tơlơi mut hrŏm mơng tơhan kông ang, ƀô̆ đô̆i, hlăk ai, đah kơmơi…Tơdơi kơ jơnum gru grua đơ đam dêh čar tui tơlơi git gai mơng Khua git gai Ping gah dêh čar ơi Nguyễn Phú Trọng, amra ƀuh pran jua hăng pran gum pơgôp djop djuai ania amra lar hyu prong ƀiă dong hăng amra pơƀuh rơđah mơng gru grua, tơlơi adôh suang”.

Lăng yôm biă mă rup hơmâo phĭn hrŏm hăng Khua git gai Ping gah dêh čar ơi Nguyễn Phú Trọng, yă H’Yam Ƀuôn Krông, dŏ amăng ƀuôn Tơng Jŭ, să Ea Kao, plơi prong Buôn Ma Thuột, tơring čar Dak Lak ol kơdol bơră ruai glăi, ñu hơmâo 2 wŏt bưp Khua git gai Ping gah dêh čar. Yôm hloh lĕ thun 2011, ñu hăng ƀing adơi amai hơmâo mơñam sa blah ao djuai ania Êđê hiam hloh brơi kơ Khua git gai Ping gah dêh čar lơm ñu nao čuă plơi pla:

“Lơm hmư̆ hing wa amra rai čuă plơi pla, ƀing gơmơi prap lui hrĕ mrai mơñam sa blah ao brơi kơ wa, anai lĕ kiăng pơdah pran khăp pap, tơlơi pơpŭ bơni mơng ƀing gơmơi hăng wa. Tal dua bưp wa lĕ lơm kâo nao jơnum pơpŭ ƀing rơgơi kơhnâo, ƀing bơwih ƀong sĭ mơdrô ba gru hăng mơnuih djuai ania arăng đăo gơnang ƀơi Hà Nội. Kâo đăo gơnang biă mă hơdôm tơlơi pơtă mơng wa hăng mơnuih djuai ania ƀiă lăi phara hăng đơ đam dêh čar hnun mơn, kiăng pơjing pran gum pơgôp, kơnong gum pơgôp kah dưi ngă truh kih djop mơta”.

Ơi Hà Ngọc Đào, Khua gơnong bruă pơtô pơjuăt hơđăp tơring čar Dak Lak brơi thâo, thun 2011, Khua git gai Ping gah dêh čar ơi Nguyễn Phú Trọng đĭ ngă khua apăn akŏ amăng Ping gah, ăt lĕ thun blan prap lui akŏ bruă pơplih phrâo, djop mơta amăng pơtô hrăm. Hăng tơlơi git gai tong ten mơng Khua git gai Ping gah, truh ră anai, tơdơi kơ 10 thun ngă tui tơlơi pơtrun mrô 29, bruă pơtô pơjuăt đơ đam dêh čar hơmâo hơdôm tơlơi pơplih phrâo kơtang hloh hăng ba glăi lu tơlơi dưi yôm phăn, sit biă ñu lĕ amăng kual mơnuih djuai ania ƀiă, kual giăm guai, kual bul pơtâo plao ia rơsĭ. Kiăng djơ̆ hăng pran đăo gơnang, kiăng khăp mơng Khua git gai Ping gah brơi bruă pơtô pơjuăt, ơi Hà Ngọc Đào brơi thâo:

“Wa Trọng rơngiă jing tơlơi rơngiă prong biă mă hăng lŏn ia ta. Kơnong kơ kâo pô ăt ol kơdol, hning rơngŏt biă mă mơn. Sa čô mơnuih apăn bruă Ping gah, kâo lêng kơ đăo gơnang Khul apăn bruă Ping gah amra git gai lŏn ia găn rơgao tơnap tap. Ră anai kiăng lăng tơlơi hning rơngŏt jing pran kơtang amăng bruă mă. Mơnuih ƀôn sang đăo gơnang nao Ping gah, gum pơgôp abih bang kar hăng sa, gum pơgôp djop djuai ania, gum pơgôp amăng Ping gah, gum pơgôp amăng abih bang mơnuih ƀôn sang tui tơlơi čang rơmang mơng wa Trọng lơm dŏ hơdip”.

Hơdor tơlơi pơtă mơng Khua git gai Ping gah dêh čar amăng hrơi ngui gum pơgôp djop djuai ania ƀơi Dak Lak thun 2018, ơi Y Giang Gry Niê Knơng, Khua Jơnum min djop djuai ania mơnuih mơnam Việt Nam tơring čar Dak Lak brơi thâo.

“Khua git gai Ping gah dêh čar ơi Nguyễn Phú Trọng lêng lăng bruă gum pơgôp abih bang mơnuih lĕ bruă yôm hloh, anai lĕ atur kơ pran kơtang mơng lŏn ia. Ngă tui tơlơi pơtă mơng Khua git gai Ping gah dêh čar, Jơnum min djop djuai ania mơnuih mơnam Việt Nam tơring čar Dak Lak tŏ tui ngă klă bruă tum pơƀut, gum pơgôp abih bang mơnuih ƀôn sang, djop djuai ania, tơlơi đăo, gum tơngan hrŏm yua kơ mơnuih mơnam, pơjing plơi pla pơdrong asah, hiam klă, gru grua”./.