VOV4.Jarai-Tơdơi kơ hơdôm hrơi pơdơi pơdă ƀong tết, pô đah kơmơi ngă pô pơ ala mơnuih ƀôn sang dêh čar tal XV djuai ania Brâu ƀơi tơring čar Kon Tum, Nàng Xô Vi glăi pơtô hrăm hăng čơđai sang hră ñu khăp ƀu-eng. Pô čih tơlơi pơhing phrâo Khoa Điềm, dŏ mă bruă ƀơi kual Dap Kơdư čih pioh tơlơi čang rơmang akŏ bơyan phang thun phrâo mơ̆ng pô đah kơmơi ngă pô pơ ala mơnuih ƀôn sang dêh čar, yak nao amăng thun tal 26 yơh.

Mơ̆ng sang ñu nao pơ anih mă bruă sang hră pơtô lĕ sang hră đôm lăm kơnuk kơna čem rông čơđai sang hră djuai ania ƀiă tơring čar Kon Tum pơdong ƀơi tơring glông Ia Hdrai, đah kơmơi pô ngă khua pơ ala mơnuih ƀôn sang dêh čar tal XV djuai ania Brâu, yă Nàng Xô Vi khom găn rơgao jơlan ataih truh 150 km đĭ rơdêh thut. Sa tơlơi dơ̆ng lăp gleng nao, jơlan mơ̆ pô đah kơmơi ngă pô pơ ala nao pơtô čơđai sang hră khăp ƀu-eng lĕ, jơlan kiăo tui treng jơlan guai dêh čar, sô̆ hăng dêh čar Lao laih anun Kur.

Ơi Y Thanh Hà Niê Kdăm, Khua Khul djop djuai ƀiă mơ̆ng sang bruă khua pơ ala mơnuih ƀôn sang dêh čar hrom hăng yă Nàng Xô Vi ƀơk gơnam kơ mơnuih ƀôn sang djuai ania Brâu ƀrô bơyan Tết Nhâm Dần 2022

Pơwơ̆t glăi pơ sang hră, tơdơi kơ bơyan pơdơi thun phrâo djuai ania, bưp glăi ƀing adơi đeh čơđai sang hră mơnuih djuai ƀiă ƀơi sang hră giăm guai dêh čar, pô đah kơmơi ngă khua pơ ala mơnuih ƀôn sang dêh čar, yă Nàng Xô Vi lăi, tơlơi ñu pơmin hăng đing nao hloh lĕ:

“Tơlơi pơtô hrăm mơnuih djuai ƀiă yơh kâo đing nao hloh. Kâo čang rơmang ngă hiư̆m pă mơ-it hiăp kơ khua mua ping gah, khua mua pơ gơnong dlông hơdôm tơlơi ta pơmin, bruă ta kiăng ngă mơ̆ng sa čô nai đah kơmơi pơtô ƀơi guai dêh čar laih anun hơdôm tơlơi pơmin mơ̆ng ƀing amĭ ama čơđai sang hră, biă mă ñu gleng nao kơ kual ataih, ƀing čơđai sang hră hlăk bưp ră anai. Klin covid 19 anom bruă pơtô pơjuăt bơbeč djơ̆ kơtang laih anun pơdjơ̆ nao tơlơi čang rơmang găn rơgao hĭ tal klin kheng ngă anai, đah mơ̆ng tañ abih, čơđai sang hră pơwơ̆t glăi hrăm pơ sang hră hăng hơdôm tơlơi phrâo hloh”.

Hrăm gah bruă pơtô địa lý, pơtô kơ tơlơi thâo lŏn glai mơnai ia dêh čar, nai pơtô pơ sang hră đôm lăm tơring čar Kon Tum ƀơi tơring glông guai dêh čar Ia Hdrai, lăi pơthâo tơlơi tom găn rơgao mơ̆ng ñu jơnum lok sa khua mua pơ ala mơnuih ƀôn sang dêh čar tal XV, đah kơmơi ngă khua pơ ala kơ djuai ania Brâu, yă Nàng Xô Vi lăi tơpă: Hăng sa čô đah kơmơi anet aneo kah hăng ñu, nao pơ plơi prong jưh jom, mut nao amăng sang jơnum khua mua pơ ala mơnuih ƀôn sang dêh čar blung a ñu lăng hling hlang biă mă, hŭi hăng ƀu khin mut ôh.

Khua pơ ala mơnuih ƀôn sang dêh čar yă Nàng Xô Vi hrom hăng Grup khua mua pơ ala mơnuih ƀôn sang dêh čar amăng tal nao mă bruă ƀơi să Pờ Y,

 tơring glông Ngọc Hồi, tơring čar Kon Tum

Giong bưp hăng ƀing pơ ala pơkŏn, lơ̆m mă bruă hăng jơnum min djop bruă tơlơi mơ̆ Nàng Xô Vi ƀuh kiăng ngă mơtam lĕ, pơblih tơlơi pơmin drơi jăn pran jua pô hăng khom pơmin phara ƀiă:
“Tơl nao jơnum lok dua kah kâo hơduah ĕp lăng hăng kơsem min hră pơar lu hloh. Tơl hyu bưp mơnuih ƀôn sang, bưp ƀing ruah khua pioh lăi pơthâo bruă mă, tơlơi jơnum mơ̆ng ta kâo huăi hŭi dong tah, dưi kjăp pran jua ta pô yua gir run hăng kjăp ƀiă laih amăng bruă mă, kơñ pơgi ăt amra gir run lu hloh dơ̆ng mơ̆n”.

Đah kơmơi ngă khua pơ ala mơnuih ƀôn sang dêh čar, yă Nàng Xô Vi, gah grup khua mua pơ ala mơnuih ƀôn sang dêh čar ƀơi tơring čar Kon Tum, jing mơnuih djuai ania Brâu, djuai ania aset hloh. Ră anai, djuai ania Brâu dŏ amăng plơi Đak Mế, să guai dêh čar Pờ Y, tơring glông Ngọc Hồi, tơring čar Kon Tum. Abih bang djuai ania anai hơmâo 173 boh sang anŏ hăng 558 čô mơnuih.

Pô pơ ala yă Nàng Xô Vi lĕ, sa tơlơi pơ-ư pơ-ang biă mă mơ̆ng djuai ania Brâu hăng jing sa gru grua tơlơi pơhmutu pran jua hur har mă bruă, gir añ kiăng găn rơgao tơlơi tơnap tap, hrưn đĭ amăng pran jua mă bruă, djru hrom kơ bruă pơđĭ kyar mơnuih mơnam plơi pla. Lăi pơthâo hơdôm tơlơi pơmin hăng anŏ čang rơmang amăng akŏ bơyan phang thun phrâo Nhâm Dần 2022, pô đah kơmơi ngă khua pơ ala mơnuih ƀôn sang dêh čar, yă Nàng Xô Vi, brơi thâo:

“Rĭm čô mơnuih ngă pô pơ ala mơnuih ƀôn sang lêng kơ hơmâo tơlơi pơmin bruă kiăng ngă, tơlơi čang rơmang mơ̆ng drơi jăn pô, ngă hiư̆m pă mơnuih ƀôn sang plai ƀiă ƀun rin, tơnap tap. Yak nao amăng thun phrâo kâo čang rơmang lĕ klin kheng covid 19 dưi pơgăn hĭ pioh kơ mơnuih ƀôn sang ta mă bruă bơwih ƀong huă pơwơ̆t glăi kah hăng tơđar. Jing sa čô mơnuih pơ ala kơ mơnuih ƀôn sang dêh čar amăng thun phrâo kâo gir run hloh, pơtô glăi, lăi pơthâo djơ̆ tơpă hloh tơlơi pơmin anŏ kiăng mơ̆ng mơnuih ruah khua truh pơ ƀing pơ ala mơnuih ƀôn sang dêh čar sit jơnum hrom abih bang./.

Khoa Điềm pô čih-Nay Jek: Pơblang