Rơnuč blan 4 thun 1975, tal blah wang Hồ Chí Minh yak nao rơwang tuč rơnuč. Kiăng kơ anăp nao tañ pơ Sài Gòn, ling tơhan pơklaih rơngai khŏm găn rơgao hơdôm puih kơđông tơhan phun mơng gong gai Sài Gòn, amăng anun hơmâo puih kơđông tơhan Đồng Dù, Củ Chi, sa puih kơđông kjăp phik mơng Sư đoàn 25 anăn “Tia chớp nhiệt đới” dêh čar Mi pioh glăi. Tơhan hơđăp Nguyễn Quang Luyến, dŏ ƀơi jơlan Nguyễn Thị Định, phường Thành Nhất, plơi prong Buôn Ma Thuột, tơhan C17-Trung đoàn 48-Sư đoàn 320A, mơnuih hrŏm hăng tơhan pơklaih mơng mơng tal blah wang kual Dap kơdư anăp nao Sài Gòn ol kơdol bơră ruai glăi:

“Mơguah lơ 29/4 djơ̆ mông rơkâo blah ngă, ƀing gơmơi krĕp 6 mông 10 mơnit mơng mơguah sing bring pơphun mut nao. Lơm pok jơlan pơphun kơsung blah kiăng hơmâo bah amăng mơng 8-9 met kiăng rơdêh asar mơng gah tlôn đuăi đĭ. Lơm 2 boh rơdêh asar mut nao, sa boh đôm glăi, kâo khŏm kuar kơnong pơkra mă kiăo tui rơdêh asar glŏm nao pơ pơga rơnuč, mah tuh drah pơčah asar ăt khŏm ngă kiăng tơhan mơng tlôn đuăi đĭ. Kâo dui hrĕ kơnong đôh kơtang tĭt, ăt ƀu thâo hơget dong tah. Lơm mơdưh glăi rơdêh asar dưi đuăi đĭ yơh, phao pơnah dik dak. Ƀơi blah kơtang biă mă, kâo aka ƀu ƀuh ôh hlâo anun”.

Tơdơi kơ găn rơgao tơhan wai pơgang Củ Chi-Đồng Dù, hơmâo grup blah ngă mơng tơhan pơklaih rơngai mut nao giăm Sài Gòn. Yang hrơi dong lơ 30/4/1975, tơhan mơgăt rơdêh asar mơng Lữ đoàn 203, Quân đoàn 2, hơmâo mut nao tơpă pơ Dinh Độc Lập-Anih phun mơng gong gai Sài Gòn lơm anun. Rơdêh asar ba jơlan hlâo mrô 843 yua Khua tơhan Bùi Quang Thận git gai dar rơdêh, tul rơbuh bah amăng jang gah ieo. Yua tô̆ tơnô̆ hơmâo gơnam pơgăn anun rơdêh djai hĭ. Rơdêh asar mrô 390 yua Khua tơhan Vũ Đăng Toàn git gai kiăo tui tlôn đuăi đĭ, hơtul rơbuh bah amăng jang phun ƀơi Dinh Độc Lập. 11 mông 30 mơnit lơ 30/4/1975 hla kơ pơklaih rơngai por hăng bơbung sang Dinh Độc Lập. Anai lĕ hrơi mông lăi pơthâo tal blah wang Hồ Chí minh hing ang truh kih laih. Ơi Nguyễn Thanh Cảnh dŏ amăng phường Thành Nhất, plơi prong Buôn Ma Thuột, tơhan pôr pơhing gah anom bruă pôr pơhing-Quân đoàn mrô 2, arăng rơkâo lăi pơthâo kơ tal blah dưi anai:

“Ƀing gơmơi rơbat rôk tui jơlan bưp lu tơnap tap, ayăt dŏ krăp blah samơ̆ ƀing gơmơi lêng kơ găn rơgao soh. Pok blung mơng gah ieo kâo ƀuh sa boh rơdêh asar dŏ đôm ƀơi anun. Laih anun rơdêh asar mrô 390 dun glăi tul bah amăng laih anun đuăi nao pơ anăp hlao. Ayong Thận yơr mă hla kơ ƀơi rơdêh laih anun đuăi đĭ hlă hla kơ pơklaih rơngai. Lơm anun Bùi Hữu Hạnh ba Dương Văn Minh tơbiă rai. Dương Văn Minh lăi ƀing gơmơi dŏ tơguăn hlâo kơ jao glăi, ayong Thận lăi ƀu hơmâo jao hơget ôh, ƀing gih guang dar laih. Lơm anun ƀing gơmơi hlơi hlơi lêng kơ ƀlĕ ia mơta, hok mơ-ak biă mă”.

Mah ngă bruă kret kruai mơ̆ ăt yôm phăn mơn, ơi Mai Văn Tiêm, dŏ ƀơi jơlan Thủ Khoa Huân, plơi prong Buôn Ma Thuột, ñu lĕ Khua anom bruă Đài Mật mã K26-anom bruă git gai tơhan mrô 3, ñu mut hrŏm khul git gai tal blah wang anai, ñu ol kơdol brơi thâo:

“Anom bruă gơmơi hơmâo wai lăng kjăp yua ƀing gơmơi tui Đại tướng Văn Tiến Dũng. Lơ 30/4 lơm kâo phrâo pơplih mă bruă, kâo pok brô̆ pơtui jua pơhiăp mơng Sài Gòn hmư̆ Dương Văn Minh lăi pơthâo gơñu lui blah yơh, amăng pran jua kâo hok mơ-ak biă mă. Kâo kơnong kơ hmư̆ boh pơhiăp: “Kâo Dương Văn Minh, Khua mir sir Việt Nam Cộng hòa lăi pơthâo lui blah hăng ling tơhan pơklaih rơngai kual Dơnung Việt Nam”. Anun kâo ur mơtăm: adơi ayong hơi, ayăt lui blah laih. Amăng pran jua hok mơ-ak biă mă, pơmĭn nao ƀlĕ ia mơta, ol kơdol biă mă”.

Ƀing ling tơhan kar hăng ơi Luyến, ơi Cảnh, ơi Tiêm…lĕ ƀing mơnuih pơƀuh brơi tong ten kơ pran sông kơtang amăng tal blah dưi bơyan bơnga thun 1975. Tơlơi kơđŏm glăi mơng tal blah wang ƀơi pioh kơđông mrô 25-Đồng Dù, hơdôm tơlơi pơsit ječ ƀơi Dinh Độc Lập, ƀudah jua pơhiăp lăi pơthâo ayăt lui blah laih mơng Gong pôr pơhing Sài Gòn, ăt dŏ na nao amăng pran jua ƀing ling tơhan đưm hlâo adih-kar hăng sa tơlơi pơtă kơ tơlơi čang rơmang rơnuk rơnua, rơngai lŏn ia./.