VOV4.Jarai - Tŭ ư tơlơi jak iâu mơng Khua mir sir dêh čar Singapore Halimah Yacob, Khua mir sir ơi Nguyễn Xuân Phúc hăng Bơnai ñu ba jơlan grup khua mua prong dêh čar Việt Nam nao čuă gưl Kơnuk kơna pơ dêh čar Singapore mơng lơ 24 truh 26/2. Anai lĕ tal nao čuă gưl kơnuk kơna blung a mơng sa čô khua git gai lŏn ia pơ dêh čar Singapore dong mơng hrơi hơmâo klin covid-19 hơđuh đĭ amăng akŏ thun 2020, ăt jing tal nao čuă blung a mơng Khua mir sir ăt kah hăng khua mua mơng Việt Nam nao pơ čar rơngiao amăng thun 2022. Tal nao čuă anai amra pơjing rai tơlơi kơtang, pơtrut tui tơlơi rô nao rai dua bơnah, biă ñu ngă hrŏm hơkrŭ glăi tơlơi bơwih ƀong, mơng anun ngă hiam hloh tơlơi rô nao rai ngă gŏp Việt Nam - Singapore. Truh mông anai, Singapore jing 1 amăng 3 boh dêh čar tuh pơ plai prăk lu hloh ƀơi Việt Nam, hơmâo 66 klai dolar hăng giăm 2.900 kơčăo bruă. Kual sang măi pơkra gơnam Việt Nam - Singapore jing sa gru pơ ala brơi tơlơi ngă hrŏm dua bơnah laih anun truh ră anai, prăk dêh čar Singapore tuh pơ plai amăng kual sang măi pơkra gơnam ƀơi Việt Nam truh kơ 14 klai dolar laih./.

Siu H’Mai: Pơblang