Khul khua mua apăn bruă ping gah Cộng sản Việt Nam, khua mua pơ ala mơnuih ƀôn sang dêh čar Cộng hòa Xã hội chủ nghĩa Việt Nam, Khua mir sir dêh čar Cộng hòa xã hội chủ nghĩa Việt Nam, Kơnuk kơna dêh čar Cộng hòa xã hội chủ nghĩa Việt Nam, Jơnum min djop djuai ania mơnuih mơnam Việt Nam hăng sang anŏ hning rơngôt prong biă mă lăi pơthâo tơlơi pơhing:

Ơi Nguyễn Phú Trọng, Khua git gai ping gah dêh čar, Khua git gai ping gah ling tơhan dêh čar, tơkeng lơ 14/4/1944; plơi pla phun: Să Đông Hội, tơring glông Đông Anh, plơi prong Hà Nội. Anih dŏ ră anai ƀơi sang mrô 5, jơlan Thiền Quang, phường Nguyễn Du, kuân Hai Bà Trưng, ƀôn prong Hà Nội.

Mut mă bruă čar dơ̆ng mơ̆ng thun 1967; mut ping gah Cộng sản Việt Nam lơ 19/12/1967. Ding kơna apăn bruă ping gah dêh čar hơdôm gưl VII, VIII, IX, X, XI, XII, XIII; ding kơna ding jum kơđi čar hơdôm tal VIII, IX, X, XI, XII, XIII; ngă ding kơna khul apăn bruă git gai Ding jum kơđi čar tal VIII; Khua git gai pơ ala mơnuih ƀôn sang dêh čar Cộng hòa xã hội chủ nghĩa Việt Nam tal XI, XII; Khua git gai ping gah Cộng sản Việt Nam hơdôm gưl, tal XI, XII, XIII; Khua mir sir dêh čar Cộng hòa xã hội chủ nghĩa Việt Nam rơwang bruă thun 2016-2021, Khua khul tơhan pơgang dêh čar hăng khua khul pơgang rơnuk rơnua lŏn ia; Khua git gai ping gah ling tơhan dêh čar; ding kơna apăn bruă phun git gai ping gah tơhan kông an dêh čar; Khua git gai mơ̆ng gơnong dlông kơ bruă pơhlôm, pơgăn tơlơi soh ƀong kông ngăn, tơlơi soh sat. Khua pơ ala mơnuih ƀôn sang dêh čar hơdôm tal XI, XII, XIII, XIV, XV.

Tơdơi kơ sa rơwư̆ rơwang duăm ruă kraih, mah hơmâo ping gah, kơnuk kơna, khul nai tha prin, ƀing ơi ia jrao rơgơi hloh djru pơjrao, sang anŏ abih pran jua bơwih brơi wai lăng tơlơi suaih pral, samơ̆ yua thun lu, tha rơma hăng ruă kraih, anun ơi rơngiă laih lơ̆m 1 mông 38 mơnit či tlam lơ 19/7/2024, jing lơ 14/6 thun Giáp Thìn, ƀơi sang ia jrao prong gah ling tơhan mrô 108, Hà Nội, hơdip truh tơnŭk 80 thun.

Giăm 60 thun mă bruă ơi hơmâo lu pran jua pơgôp prong biă mă, ngă giong hiam klă hloh amăng bruă jao lơ̆m bruă hơkrŭ mơ̆ng ping gah hăng djuai ania. Ơi dưi hơmâo Ping gah, Kơnuk kơna hơmâo apah bơni hăng Miđai pơtŭ mah, miđai 55 thun ping gah hăng lu miđai yôm pơkon mơ̆ng Việt Nam hăng jar kmar pơpŭ.

Ơi đuăi nao jing sa tơlơi rơngiă rơngiom prong prin biă mă hăng Ping gah, Kơnuk kơna, mơnuih ƀôn sang dêh čar ta laih anun sang anŏ Ơi. Kiăng pơdah rai pran jua rơngôt hning hrŏm laih anun hơdor glăi kơ Khua git gai ping gah dêh čar ơi Nguyễn Phú Trọng, Khul khua mua apăn bruă ping gah Cộng sản dêh čar Cộng hòa xã hội chủ nghĩa Việt Nam, Kơnuk kơna dêh čar Cộng hòa xã hội chủ nghĩa Việt Nam, Jơnum min djop djuai ania mơnuih mơnam dêh čar Việt Nam pơsit hrŏm pơphun ngă lơphet mơyut jôk atâo Khua git gai ping gah ơi Nguyễn Phú Trọng hăng hơdră lơphet prong hloh gưl dêh čar.

Khul khua mua apăn bruă ping gah Cộng sản Việt Nam, khua git gai pơ ala mơnuih ƀôn sang dêh čar Cộng hòa xã hội chủ nghĩa Việt Nam, Khua mir sir dêh čar Cộng hòa xã hội chủ nghĩa Việt Nam, Kơnuk kơna dêh čar Cộng hòã xã hội chủ nghĩa Việt Nam, Jơnum min djop djuai ania mơnuih mơnam Việt Nam