VOV4.Jarai - Tui hăng boh tơhnal mrô bơkơtưn bơwih ƀong gưl tơring čar thun 2021, PCI mơng tơring čar Dak Nông đĭ 8 wơ̆t pơhmu hăng thun hlâo, mơng dong gah rơnuč hrưn đĭ tong krah. Tŏ tui tơlơi dưi ngă anai, Dak Nông glăk gir pơplih bruă tuh pơ plai đah mơng ngă pơhưč anom bruă tuh pơ plai prăk, pơplih phrâo prong hloh amăng bruă pơđĭ kyar bơwih ƀong huă mơnuih mơnam.

Ơi Nguyễn Đức Lộc, Khua kông ti TNHH sa ding kơna Vạn Thương - Dak Nông brơi thâo, anom bơwih ƀong nao sem lăng pơ Dak Nông mơng 3 thun hlâo laih, samơ̆ truh rơnuč thun 2021 kah mơng ngă 2 kơčăo bruă tuh pơ plai bơwih ƀong amăng tơring čar.

“Tơdơi kơ jơlan hơdră tơlơi hrưn đĭ mơng Dak Nông kâo ƀuh rơđah tơlơi pơplih prong biă mơng ƀing khua tơring čar truh pơ anom bruă, gơñu mă bruă kơtang hloh kơ mơng hlâo, tañ pơsir brơi hră pơ-ar kơ anom bơwih ƀong tuh pơ plai prăk bơwih ƀong. Ră anai gơmơi glăk ngă kơčăo bruă hơmâo hră pơ-ar pơsit brơi laih, hơmâo sa anih ngă hmua hăng boh thâo phrâo ƀơi Gia Nghĩa hăng sa boh sang măi pơkra kyâo kram bơrơpih ƀơi Tuy Đức”.

Glăk pơtrut man pơkra ha wơ̆t mơtăm 2 boh sang ia jrao ƀơi plơi prong Gia Nghĩa hăng tơring glông Čư̆ Jut, lêng ƀơi tơring čar Dak Nông, Nai tha prin ơi ia jrao Nguyễn Văn Châu, Khua anom bruă ia rjao Xuyên Á lăi, tơlơi ñu lăp djă pioh blung a lơ̆m nao pơ kual lŏn phrâo bơdjơ̆ nao prong biă tơlơi pơmin tuh pơ plai mơng anom bơwih ƀong. Bơhmutu kơ bruă bơbưp hăng Khua Jơnum min mơnuih ƀon sang tơring čar Dak Nông, ñu brơi thâo, tơlơi jê̆ giăm, tơhmă mơng khua mua tơring čar jing pơtrut anom bruă tuh pơ plai thim 1 boh sang ia jrao dong amăng tơring čar. Bruă kiăng ră anai lĕ tơlơi pơtrut pơsur pran jua mơng ƀing khua tơringc car truh pơ khua mua gơnong bruă, plơi pla, dưi ngă hrŏm ha wơ̆t pơkra brơi lu hră pơ-ar. Bruă ngă brơi hră pơ-ar tañ ƀu kơnong pơdah pran jua kiăng khăp, tơlơi gir run mơng tơring čar đôč ôh mơ̆ ăt djru brơi ƀing tuh pơ plai bơwih ƀong čơkă mă tañ tơlơi gêh gal, dưi pơsir hơdôm bruă hơmâo pơ anăp dong. Ơi Nguyễn Văn Châu lăi:“Anom bơwih ƀong kiăng tơlơi prong hloh anun lĕ: Tañ! Bơ kiăng tañ lĕ khŏm ngă rơđah rơđông, brơi abih bang thâo, khŏm pơsir hĭ djŏp mơta bruă kiăng ƀing tuh pơ plai dưi ngă bruă ba glăi boh than tañ hloh. Mah hră pơ-ar lu biă, kiăng ngă rơđah bơwih ƀong gah bruă anai kiăng hơdôm mơta hră pơ-ar, tuh pơ plai bruă anai hiư̆m pă mơng rơđah. Ta ngă rơđah lĕ ta ƀu hŭi hơget ôh, ngă rơđah lu tơlơi ta hơmâo hơtai tuh pơ plai lu mơn, lơ̆m anun ta ƀu hŭi ngă soh dong tah”.

Jơlan hơdră “Čang rơmang Dak Nông” pơphun amăng blan 10/2021, tơlơi lăp hơdor ngă pơhưč tuh pơ plai mơng tơring čar.

Tui hăng tơlơi pơtŏng glăi mrô bơkơtưn gưl tơring čar thun 2021, PCI mơng tơring Dak Nông hơmâo 61.95 puang, dong mrô 52/63 boh tơring čar, ƀon prong, đĭ 8 wơ̆t pơhmu hăng thun hlâo. Mơng tơring čar dong gah rơnuč, tơring čar hrưn đĭ tong krah. Kơ-iăng khua gum bruă Khul bơwih ƀong sĭ mơdrô hăng boh thâo măi mok Việt Nam - ơi Đậu Anh Tuấn, lăi, Dak Nông pơplih phrâo laih mrô dưi bơhno hăng tơring čar pơkŏn. Amăng hơdôm mrô pơkă lĕ hơmâo 7 mrô pơkă đĭ puang, 6 tơlơi pơkă đĭ mrô dong; biă ñu hơdôm mrô pơkă kơ tơlơi hơdeč hmar, nao hlâo ngă bruă mơng gong gai, hrơi blan, bruă pơkra tơlơi phiăn đĭ rơbêh 20 wơ̆t pơhmu hăng thun hlâo. Tơlơi gơñăm nao ră anai lĕ anom bơwih ƀong kiăng tuh pơ plai amăng tơring čar aka ƀu hơmâo tơlơi pơplih tui hăng Dak Nông, jing tơlơi gêh gal kiăng tơring čar dưi pơjing rai tơlơi truh kih phrâo:

“Kâo pơmin Dak Nông aka ƀu djơ̆ tơring čar nao hlâo ngă pơhưč tuh pơ plai ôh samơ̆ Dak Nông amra dưi đĭ kyar tañ biă. Juăt ñu ƀing tuh pơ plai bơwih ƀong amra ruah tơring čar mơ̆ gơñu lăng ƀơi anun amuñ bơwih ƀong sĭ mơdrô, ƀu kơnong tơlơi gêh gal đôč ôh arăng ƀuh hơmâo tơlơi ƀuăn kơjăp mơng khua mua git gai. Dak Nông ăt čang rơmang hrưn đĭ laih anun hơmâo akŏ bruă rơđah ngă pơhưč, čơkă arăng rai tuh pơ plai bơwih ƀong prong, laih dong anai jing tơlơi gơñăm nao klă biă, amra ngă pơplih tơring čar amăng hrơi blan pơ anăp”.

Ha mơkrah thun 2022, tơring čar Dak Nông ngă pơhưč 11 kơčăo bruă, prăk tuh pơ plai 1000 klai prăk.

Hơmâo lu tơlơi gêh gal amăng bruă bơwih ƀong gah pơtâo čuah, ngă hmua, tuai hyu ngui, Dak Nông amra pơplih prong amăng bruă pơhưč arăng tuh pơ plai, pơđĭ kyar bơwih ƀong huă mơnuih mơnam.

Tui hăng ơi Hồ Văn Mười, Khua Jơnum min mơnuih ƀon sang tơring čar Dak Nông, hơdôm tơlơi pơplih mrô PCI amăng thun blan laih rơgao ngă tơnap prong mơn kiăng tơring čar pơplih kơtang hloh. Khua mua tơring čar ăt kah hăng hơdôm gơnong bruă hơmâo bưp re se anom bơwih ƀong, lăng glăi, pơsir brơi tơlơi tơnap tap. Hăng pran jua hrưn pơ anăp, Dak Nông amra hmư̆ tơlơi pơgô̆p hiăp mơng hơdôm anom bơwih ƀong, pơhmư̆ tui tơlơi pơgôp hiăp mơng ƀing kơhnâo, hrăm tui mơng hơdôm boh tơring čar hơmâo mrô PCI lu hloh...đah mơng ĕp hơdră ngă pơhưč arăng rai bơwih ƀong. Ơi Hồ Văn Mười pơsit, Dak Nông gir ngă gah brơi anih tuh pơ plai, sĭ mơdrô klă hloh, rơđah hloh, ngă kơ anom bơwih ƀong đăo gơnang, mă bruă hơđong hăng pơđĭ kyar.

“Mah hơmâo laih tơlơi pơplih prong, samơ̆ khŏm ƀuh rơđah boh than ba glăi blung a tui anun đôč. Ră anai lăi nao kơ Dak Nông lĕ djŏp pô lêng thâo soh yơh tơlơi gêh gal prong samơ̆ tơlơi lông ăt prong mơn. Ƀing ta khŏm ĕp hơdră pơsir brơi hơdôm tơlơi lông anai, jing pran jua gum pơgôp ngă bruă hloh dong. Ră anai, lăng nao abih bang, khua tơring čar hăng hơdôm gơnong bruă mơng Dak Nông ngă bruă kơtang hloh djru brơi hơdôm anom bơwih ƀong, samơ̆ bruă gir run anun aka ƀu djŏp ôh, kiăng djŏp gưl khua mua nao truh pơ phường să, plơi pla dong, gir ngă hrŏm, kâo pơmin tui anun amra truh kih hloh”.

Minh Huệ: Čih - Siu H’Mai: Pơblang