Ƀơi kông ty pơčruh ngăn pơkra pơsơi kuăt (Kwăt) Asean amăng ƀut anom tuh tia pơkra ming Hòa Phú, hơdôm boh sang măi pơphun mă bruă abih tơhnal pơkă. Tui hăng yă Lê Thị Tuyết Hạ, Kơ-iăng khua kông ty lăi, hơmâo năng ai 600 čô mơnuih mut mă bruă mơ̆ng hơdôm hrơi akŏ thun phrâo mơtam. Kông ty ăt hơmâo tŭ mă lu hră rơkâo blơi gơnam hăng ƀing ngă hrŏm sĭ mơdrô hơđăp hăng phrâo, čang rơmang hơdôm bruă mă pơphun amăng akŏ thun mơtam amra hơmâo boh tơhnal klă hiam abih thun 2024:

“Tơdơi kơ sa rơwư̆ pơdơi pơdă čơkă ngă yang thun phrâo, hrơi tơgŭ mă bruă thun phrâo mơ̆ng djop anih mut mă bruă djop soh, akŏ thun phrâo Khul khua mua kông ty ăt ƀơk prăk pơpŭ thun lì xì kiăng pơtrut pran jua tơgŭ mă bruă thun phrâo kơ abih bang ƀing adơi amai, adơi ayong kông ñơn. Khul khua mua anom bruă ăt čang rơmang anih anom sĭ mơdrô dưi bơngač hloh, lu ring bruă pơkra ming dưi hơmâo lu kông ty blơi, kiăng anom bruă pơkra ming, mă bruă hơđong djru kơ mơnuih mă bruă apah hơmâo bruă mă na nao laih anun pơhrui prăk blan lu hloh”.

Ăt hơdôm hrơi blung a akŏ thun phrâo Giáp Thìn, kông ty pơkă hnong tơlơi gơgrong juăt lăi TNHH tơčoh eng ao Lực Thiêm ƀơi ƀut sang măi tuh tia pơkra ming Tân An 2 hơmâo tŭ mă lu hră rơkâo blơi gơnam phrâo. Ơi Trần Trí Vỹ, Khua kông ty brơi thâo, 1000 čô mơnuih ngă kông ñơn pơwơ̆t glăi mă bruă, amăng anun 95% lĕ mơnuih djuai ƀiă hăng 90 čô lĕ đah kơmơi. Ră anai, kông ty hlăk jak iâu pơmut thim mơnuih mă bruă hăng pok prong sang bruă pioh pơphun bruă mă kiăng dưi djop gơnam ba sĭ mơdrô tui hăng hră rơkâo blơi phrâo:

“Anom bruă bơwih ƀong huă mơdrô tơgŭ mă bruă mơ̆ng lơ 10 thun phrâo, hrơi mă bruă blung a, abih bang mơnuih mă bruă apah mut mă bruă truh 98%. Thun anai, hră rơkâo blơi gơnam pơkra ming lu hloh pơkă hăng thun hlâo lĕ năng ai 20%, tơlơi anai ngă gêh găl brơi kơ anom bruă bơwih ƀong huă mơdrô dưi pơđĭ kyar hmar ƀiă dơ̆ng. Tơ tă anai, kông ty hlăk iâu pơmut thim mơnuih mă bruă apah, yua mơnuih mă bruă apah amăng tơring dŏ lu, ră anai abih bang 1000 čô mơnuih mă bruă. Amăng 3 blan tal sa thun anai, anom bruă amra iâu pơmut dơ̆ng 300 čô mơnuih mă bruă gêh găl hăng tơlơi thâo laih anun dưi djop hăng hră rơkâo blơi gơnam gơmơi pơkra rai”.

Tơlơi pơhing ƀuh mơak mơ̆ng lu anom bruă bơwih mơdrô hơmâo djru ba ƀing ngă kông ñơn gir run hloh lơ̆m mut mă bruă rim hrơi mơ̆ng akŏ thun phrâo mơtam. Amai H’Theo Triết dŏ ƀôn Jun, să Yang Tao, tơring glông Lak, ră anai ngă kông ñơn mă bruă ƀơi kông ty pơkă hnong gơgrong ba tơčoh eng ao Lực Thiêm brơi thâo, amra gir run hloh ngă giong bruă jao kơ ñu đah mơ̆ng pơđĭ tui rơnoh pơhrui glăi prăk blan:

“Dơ̆ng mơ̆ng hrơi kâo mut rai mă bruă ƀơi kông ty tơlơi hơdip mơda gơmơi pơblih ƀiă laih hăng tơlơi djru mơ̆ng kông ty ăt djơ̆ lăp mơ̆n. laih ƀong têt giong, kâo ƀuh djop mơnuih mut mă bruă lêng kơ hok mơak soh, kiăng tơgŭ mă bruă dơ̆ng”.

Tui hăng ơi Nguyễn Kim Tùng, Khua anom bruă wai lăng Ƀut tuh tia pơkra ming Tân An, ră anai ƀut tuh tia pơkra ming hơmâo 73 boh anom bruă bơwih ƀong mơdrô hlăk mă bruă, rơnoh pơbuă tui anih apah pơdong sang bruă amăng ƀut djop laih. Hơdôm hrơi akŏ thun phrâo 2024 tơlơi pơhing tơgŭ mă bruă ƀơi djop sang măi, anih mut mă bruă ƀuh dik dăk yơh, abih bang khut khăt run ran pran jua mă bruă kiăng pơkra ming rai gơnam tam klă hiam, tŭ yua hloh.

“Truh mông anai, abih bang sang bruă bơwih ƀong mơdrô hơmâo pơphun tơgŭ mă bruă thun phrâo laih anun mrô mơnuih mă bruă hlâo kơ têt hăng tơdơi kơ têt ƀu pơblih đĭ trun ôh laih anun akŏ bruă ăt pơphun ngă djơ̆ hăng bruă dăp hlâo, truh 3 blan tal 1 thun anai hăng 3 blan tal dua hơmâo dơ̆ng 2000 čô mơnuih mă bruă. Akŏ thun phrâo ƀuh ƀut tuh tia pơkra ming, ƀing khua mua, mơnuih mă bruă hăng ƀing kông kơñ tơgŭ mă bruă hok mơak soh. Čang rơmang amăng thun 2024 tơlơi bơwih ƀong huă huăi tơnap tap đơi ôh laih anun djop mơnuih mă bruă hur har kiăng ba glăi dram gơnam hăng pơhlôm brơi tơlơi hơdip mơda klă hiam kơ abih bang mơnuih dŏ mă bruă pơ anai”.

Bơyan phang bơnga akŏ thun phrâo 2024 hăng lu tơhnal pơkă, bruă mă phrâo mơak hăng djop anom bruă bơwih ƀong mơdrô, mơnuih mă bruă apah ƀơi Dak Lak hơđong pran jua, đăo kơnang, čang rơmang prong kơ boh tơhnal tŭ yua phrâo amăng bruă pơđĭ kyar bơwih ƀong huă mơnuih mơnam, pơblih tui tơlơi hơdip mơda mơnuih ƀôn sang.