VOV4.Jarai - Ơi Võ Văn Thưởng, Khua Grŭp mă bruă Ping gah pơ ala kơ Ding jum kơđi čar phrâo kĭ mă yua Tơlơi pơkă mrô 65 mơng Ding jum kơđi čar kơ bruă pơplih nao rai mơnuih apăn bruă. Hluai tui tơlơi pơmin bruă pơplih khua apăn bruă lĕ sa bôh yôm amăng bruă khua apăn bruă, tơlơi pơkă mrô 65 dưi mă yua hăng bôh than pơplih dong bruă pơplih mơnuih apăn bruă, pơhlôm kơjăp, tơpă, pơdah rơđah, dưm kơnar; ƀu hmâo tơlơi ƀu klă truh amăng bruă apăn. Tơlơi pơkă ăt lăi rơđah mơn rơwang, mơnuih, bruă apăn pơplih nao rai, kiăo tui anun bruă pơplih nao rai mơnuih apăn bruă mơng kơdlông trun, mơng yŭ đĭ kơdlông, mơng tơring čar, ƀôn prong anai nao pơ̆ tơring čar, ƀôn prong pơkon; kơplah wah hơdôm bôh ƀirô, khul grŭp sa gưl amăng glông bruă kơđi čar. Mơnuih anun lĕ hơdôm mơnuih apăn bruă dưi pơkă bruă apăn git gai, wai lăng hơdôm gưl. Pơkă tơlơi rơkâo, gưl hmâo tơlơi dưi pơsit pơplih nao rai mơnuih apăn bruă git gai pơdŏng kơčăo bruă pơplih mơnuih apăn bruă hăng pơpha bruă mă hăng mơnuih phrâo pơplih anih mă bruă; ngă tui tơlơi pơkă, hră pơ-ar pơhlôm tơpă, pơdah rơđah; pel ĕp, lăng tui, pơsir tơlơi ngă soh; wai lăng, pơsit, lăng glăi rim thun hăng mơnuih pơplih anih apăn bruă; klah čun ha mơkrah rơwang bruă hăng sa rơwang bruă pơplih anih apăn bruă./.

Siu H’ Prăk: Pơblang