VOV.Jarai - Lơ (28/2), ƀơi Hà Nội pơphun mông kĭ pơkôl ngă hrŏm amăng pơhrŏ trun ƀun rin kơplah wah Jơlan jơdră pơđĭ kyar Sang gum hơbit djop dêh čar (UNDP) hăng Anom bruă dêh čar amăng pơhrŏ trun ƀun rin, Ding jum bruă mă, tơhan rơka hăng mơnuih mơnam laih dong lăi pơthâo bruă “Pơjing jơlan hơdră hăng črâo ba hơdră pơhrŏ trun ƀun rin djop mơta hăng hơđong kjăp, rơwang thun 2021-2023”. Jơlan hơdră ngă tui bruă đing nao mơnuih mơnam, bruă tuh pơ alin tơl anih, črâo ba mơnuih rin rơpa; pơsit tong yua hơget ba truh tơlơi rin rơpa kiăng kơ hơmâo hơdră tong ten djru brơi mơnuih ƀun rin, kual ataih, asuek. Đĭ pơhiăp amăng mông jơnum, Pô pơ ala brơi Jơlan hơdră pơđĭ kyar sang gum hơbit djop dêh čar (UNDP) ƀơi Việt Nam yă Caitlin Wiesen brơi thâo: Mơng hră kĭ pơkôl hrơi anai, UNDP amra tŏ tui črâo ba hơdră bruă hăng djru brơi boh thâo kơ Ding jum bruă mă, tơhan rơka hăng mơnuih mơnam kiăng kơ pok prong hơdôm hơdră bruă thâo pơčeh phrâo, hơmâo mă yua lông lăng amăng pơhrŏ trun ƀun rin hơđong kjăp rơwang thun 2021-2025 hăng ngă tui hơnong pơkă amăng jơlan hơdră anun lĕ pơhrŏ trun mrô sang anŏ ƀun rin hăng giăm ƀun rin dŏ ha mơkrah amăng thun 2025.

Siu Đoan: Pơblang