Amăng sang hnal kyâo phrâo pơdŏng glăi, yă H’Náp Niê, djuai ania Êđê ƀơi ƀuôn Kplang, să Tân Tiến, tơring glông Krông Pač, tơring čar Dak Lak mơ-ak biă: abih bang sang anô̆ rơbêh kơ 20 čô mơnuih hmâo 3 rơnuk, 4 bôh sang anô̆ anet, leng kơ pơpĕ đuăi nao dô̆ pơ̆ anih phrâo. Sang anô̆ ñu hmâo giăm truh 2.000 m2 lŏn dô̆ hăng lŏn ngă đang gah kual pơkă pơkra jơlan đuăi hmar. Blung a, djop mơnuih ăt dô̆ pơmin lăng mơn yua kơ rơnoh pơ ala glăi, djru ba ƀiă bơhmu hăng nua pơkă hrŏm. Samơ̆ laih anun ƀuh mơnuih apăn bruă mơ̆ng tơring glông nao pơ̆ să, plơi gir run lăi pơhing pơsur, yă H’Náp Niê ăt thâo hluh mơn tơhnal yôm phăn mơ̆ng jơlan đuăi hmar hăng tơlơi pơđĭ kyar plơi pla ala ƀôn.

 “Sang kâo lĕ djơ̆ hăng ƀơi anih pơkra đuăi hmar găn nao, kơnuk kơna brơi ba nao dô̆ pơkon, yua anun sang anô̆ kâo ruh sang hơđăp pơdŏng glăi ƀơi añrông 3 anai. Yua kơ kơnuk kơna pơkra jơlan đuăi hmar kơ djop mơnuih anun ƀing gơmơi ăt tŭ ư hrŏm mơn hăng rit đuăi anih dô̆ rai pơ̆ anai. Tơdơi anai hmâo jơlan đuăi hmar laih ăt čang rơmang mơn kơnuk kơna ngă gal brơi kơ mơnuih ƀôn sang bơwih ƀong huă pơđĭ kyar hloh, hmâo jơlan đuăi hmar bruă rô hyu amra tañ hloh”.

Ƀuôn Kplang lĕ anih dô̆ sui thun mơ̆ng neh wa djuai ania Êđê. Yă H’Ƀiơi Byă, Khua git gai Grŭp Ping gah ƀuôn Kplang (să Tân Tiến, tơring glông Krông Pač) brơi thâo, rơwang bruă jơlan đuăi hmar Khánh Hòa – Buôn Ma Thuột găn mut krah ƀuôn, bơdjơ̆ nao ha mơkrah mrô sang anô̆ mơnuih ƀôn sang. Lu sang pơkra kơjăp, lu đang phun pla hmâo nua yôm khom čuk lui pioh pơkra jơlan. Blung a, bruă lăi pơhing, pơsur pioh neh wa tŭ ư hăng nua pơ ala glăi kơ lŏn lĕ tơnap tap biă. Tui anun mơn, tơlơi tơnap anun ƀơƀrư̆ dưi pơtlaih lơm khul mơnuih apăn bruă tơring glông nao mă bruă hăng mơnuih apăn bruă să, plơi, dô̆ hrŏm, ƀong huă hrŏm, gum hrŏm lăi pơhing, pơsur thâo hluh, lăi pơthâo hăng mơnuih ƀôn sang. Yă H’Ƀiơi Byă brơi thâo.

 “Blung a rơgao kơ lăi pơthâo hăng mơnuih ƀôn sang lĕ ƀuôn pô amra hmâo jơlan đuăi hmar, tơña lăng mơnuih ƀôn sang pô tŭ ư mơ̆n? Samơ̆ ƀơi ƀuôn Kplang anai lu sang hmâo jơlan đuăi hmar găn nao, nua pơ ala glăi lăp djơ̆ mơn, mơnuih ƀôn sang pô ăt tŭ ư mơn, mă prăk pơ ala glăi pơkra sang dô̆ pơ̆ anih pơkon, blơi lŏn pơkon”.

Ơi Trịnh Minh Tâm, Khua git gai Ping gah ngă rah Khua Jơnum min mơnuih ƀôn sang să Tân Tiến, tơring glông Krông Pač, tơring čar Dak Lak brơi thâo, đơ đam să hmâo 241 bôh sang anô̆ mơnuih ƀôn sang bơdjơ̆ nao lơm pok pơhai rơwang bruă jơlan đuăi hmar Khánh Hòa – Buôn Ma Thuột. Anai lĕ rơwang bruă hmâo rơwang pơkă prong hloh, bơdjơ̆ nao lu sang anô̆ hloh, samơ̆ čơkă mă glăi lĕ dưi hmâo tơlơi tŭ ư prong hloh hăng pơsir anih anom pơkra jơlan tañ hloh.

 “Hăng să, abih bang glông bruă kơđi čar hyu lăi pơhing hơdôm bôh sang anô̆ mơnuih ƀôn sang kiăng gơñu thâo hơdră pơtrun. Mơnuih apăn bruă ƀơi anăp pô nao jơnum mơnuih ƀôn sang, lăi pơhing pơsur mơnuih ƀôn sang pioh tañ jao glăi lŏn pơkra jơlan. Truh mông anai 241 bôh sang anô̆ hmâo jao laih lŏn kơ anom man pơkra".

Ƀơi “anih lu sầu riêng” mơ̆ng Dak Lak, anih sa črăn lŏn sa tơlâ̆o mah kah hăng tơring glông Krông Pač, bruă pơsir anih anom pioh pơkra jơlan lĕ sa tơlơi prong biă. Ngă hiưm hơpă pioh hmâo tơlơi tŭ ư mơ̆ng mơnuih ƀôn sang, ơi Trần Hồng Tiến, Khua git gai Ping gah tơring glông Krông Pač, brơi thâo, anun lĕ tơlơi pơsit, khut khăt, khin pơmin, khin ngă hăng khin gơgrong mơ̆ng khul mơnuih apăn bruă.

 “Tơnap tap hloh ƀơi anai lĕ tơlơi tŭ ư hrŏm amăng mơnuih ƀôn sang, ngă hiưm hơpă pơsir anih pioh pơkra jơlan. Krông Pač hmâo bơdjơ̆ nao prong hăng rơbêh kơ 300 ektar lŏn, biă ñu lŏn ngă đang hmua hmâo nua yôm. Hmâo hơdôm phun sầu riêng thun tal 5-6 lĕ sa thun amra pơhrui hmâo mơ̆ng 30-40 klăk prăk. Samơ̆ tui hăng nua kơnuk kơna lĕ, kơnong kơ pơ ala glăi năng ai ñu 7 klăk prăk đôč. Ră anai ngă hiưm hơpă pioh mơnuih ƀôn sang tŭ ư hrŏm, tui anun ƀing ta pơjing grŭp črâo ba gưl tơring glông, gưl să, pơjing hơdôm grŭp lăi pơhing, pơsur”.

Jê̆ hăng anai, thâo hluh mơnuih ƀôn sang hăng khin pơmin, khin ngă, khin gơgrong lĕ hơdôm tơlơi lăng ƀuh rơđah ƀơi grŭp mơnuih apăn bruă, khua git gai, mơnuih ping gah ƀơi tơring glông Krông Pač, tơring čar Dak Lak amăng bruă pok pơhai pơsir anih anom man pơkra jơlan đuăi hmar Khánh Hòa – Buôn Ma Thuột. Kơnang kơ anun, rơwang bruă hmâo laih tơlơi tŭ ư hrŏm prong mơ̆ng mơnuih ƀôn sang. Tơlơi pơmin Ping gah djơ̆ hăng pran jua mơnuih ƀôn sang, kah hăng abih bang neh wa ƀơi hơdôm bôh plơi pla tơring glông Krông Pač leng kơ mơ-ak pĕ pha lŏn pioh Kơnuk kơna pơkra jơlan đuăi hmar./.