Pok pơhai hơdôm tơlơi pơkă tơlơi phiăn kơ lŏn drŏn, tơring čar Dak Lak pel ĕp glăi hmâo rơbêh kơ 188.000 ektar lŏn mơ̆ng hơdôm plah tơsiong đang hmua, đang kyâo gah bruă jao kơ gưl tơring glông wai lăng. Khă hnun hai, truh blan 7/2024, tơring čar phrâo pơsit mă 2 jơlan gah mă yua lŏn hmâo phun akha mơ̆ng plah tơsiong đang hmua, đang kyâo yua kơ Jơnum min mơnuih ƀôn sang hơdôm bôh tơring glông, plơi prong pơjing, 20 jơlan gah dô̆ glăi glăk amăng rơwang pơplih pơkra, pơhrua nao ngă giong, akă lăi pơsit.

Ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak brơi thâo, bruă kaih pơsit hơdôm jơlan gah mă yua lŏn hăng kual lŏn hmâo phun akha mơ̆ng plah tơsiong đang hmua, đang kyâo bơdjơ̆ nao ƀu anet bruă ngă pơhưč tuh pơplai, hơđong tơlơi hơdip mơda mơnuih mơnam, pơđĭ kyar bơwih ƀong ƀơi plơi pla. Yua anun, kiăng Tơlơi phiăn Lŏn drŏn thun 2024 mă yua, pơsir ba glăi bôh tơhnal hơdôm tơlơi bơdjơ̆ nao rơbêh kơ ha mơkrah klăk ektar hmâo phun akha mơ̆ng plah tơsiong đang hmua, đang kyâo, khom hmâo tơlơi gum hrŏm kơjăp kơplah wah gơnong bruă, grŭp, anom bruă hăng gong gai gưl tơring glông./.