Lơm lơ 16/7, Khul Khua pơ ala mơnuih ƀôn sang tơring čar Dak Lak tal 10, rơwang bruă 2021-2026 hmâo pel ĕp laih tơhnal pơkă, kơčăo bruă pơđĭ kyar bơwih ƀong – mơnuih mơnam, pơhlôm pơgang lŏn ia, rơnuk rơnua plơi pla, hơđong ngă giong tơhnal ba tơbiă pơđĭ kyar 8% amăng thun anai hăng pơsit lu bôh yôm phun pioh hmao pơtlaih tơlơi tơnap kơ bruă gong gai 2 gưl mă bruă hơđong, ba glăi bôh tơhnal.

6 blan akô̆ thun, bơwih ƀong – mơnuih mơnam tơring čar Dak Lak djă pioh rơnoh pơđĭ kyar klă, hmâo 7%, abih bang pơhrui ngăn drăp hmâo rơbêh kơ 8.700 klai prăk, abih bang prăk pơhrui mơ̆ng gơnam sĭ kơ dêh čar tač rơngiao hmâo 1.520 klăk dolar Mi... 6 blan rơnuč thun, Dak Lak hrưn đĭ pơtrut rơnoh pơđĭ kyar bơwih ƀong 8,64%; hrŏ trun mrô sang anô̆ ƀun rin mơ̆ng 3% hăng lu hloh... Amăng tal jơnum, Khul Khua pơ ala mơnuih ƀôn sang tơring čar Dak Lak hmâo pel ĕp, pơsit pel ĕp hơdôm tơlơi pơtrun pơsit: pơplih pơkra prăk ngăn drăp mă yua ƀơi tơring čar, pơplih pơkra kơčao bruă tuh pơplai bruă hrŏm; pơhrua nao prăk pơkă mă yua na nao kơ hơdôm jơlan hơdră mơ̆ng dêh čar pơkă; mă yua hơdră pơkă, hơdră bruă djru mơnuih apăn bruă, mơnuih mă bruă čar, mơnuih mă bruă pơkon ƀơi Anom mă bruă čar phrâo; pơkă rơnoh mă yua kơ hơdôm bruă bôh thâo đưm, tơlơi adôh suang, pơsur bruă măi mok.

Tui tơlơi pơtrun mơ̆ Jơnum min pơ ala mơnuih ƀon sang tơring čar Dak Lak phrâo lăi pơthâo, ƀing apăn bruă, mơnuih mă bruă amăng hơdôm anom bruă Ping gah, kơnuk kơna, Jơnum min djop djuai ania mơnuih mơnam Việt Nam, hơdôm khul grup kơđi čar-mơnuih mơnam hơmâo pơkiăo nao mă bruă ƀơi hơdôm anom bruă ngă hră pơ-ar să amra djru brơi prăk nao rai, prăk duh sang dŏ hăng prăk djru brơi ha wŏt. Sit biă ñu, ƀing mơnuih nao mă bruă ƀơi hơdôm anom bruă amăng tơring čar amra djru brơi blung a 2 klăk prăk hăng rĭm blan djru 2 klăk prăk brơi bruă nao rai, 3 klăk prăk brơi anih dŏ. Hăng ƀing mơnuih mă bruă ƀơi hơdôm anom bruă gưl să, rơnoh prăk djru hơmâo yap tui hluai glông jơlan nao rai ataih giăm, mơng 500 rơbâo truh 2 klăk prăk/čô/blan hăng 1,5 klăk prăk/čô/blan prăk duh sang dŏ (tơdah ataih rơbêh 30 km) hăng 1 klăk prăk djru brơi ha wŏt. Hrơi mông ngă tui hơdră djru anai lĕ 12 blan./.