Gơnong bruă pơtô pơhrăm tơring čar Dak Nông thun hrăm anai kơƀah 1.545 čô nai pơtô tui hơdră ƀong prăk kơnuk kơna, bơ̆ bruă ia jrao tơring čar ră anai glăk kơƀah 664 čô mơnuih tui hơdră ƀong prăk kơnuk kơna. Mrô mơnuih glăk kơƀah anai hmâo mơ̆ng lu thun hăng anai laih hăng jai hrơi lu tui. Khă tơring čar hmâo gơgrong hlâo mă yua Tơlơi pơtrun pơkă 111 thun 2022 mơ̆ng Gong gai dêh čar pioh kĭ pơkôl mă bruă hmâo hrơi pơkă hăng 643 čô mơnuih samơ̆ akă djop tui tơlơi kiăng kơ bruă pơtô pơhrăm hăng bruă ia jrao, biă ñu lĕ hăng kual asuek, ataih, kual djuai ania ƀiă.

Ơi Lê Văn Chiến, Kơ-iăng Khua Jơnum min mơnuih ƀôn sang tơring čar Dak Nông brơi thâo, hmâo lu tơlơi akă gal amăng bruă jao mơnuih ruah pioh pơtô hăng ơi ia jrao kơ sa tơring čar kual čư̆ siăng, mrô mơnuih ƀôn sang đuăi hyu dô̆ đĭ tañ hăng mơnuih ƀôn sang dô̆ raih daih kah hăng ƀơi tơring čar. Mrô mơnuih ruah mă bruă tui hơdră ƀong prăk kơnuk kơna dưi jao ƀiă hloh mrô pơkă hrŏ trun rim thun, ba truh 2 gơnong bruă yôm phăn anai kơƀah laih jai hrơi jai kơƀah tui dong./.