Dong mơ̆ng akô̆ blan 7/2025, Jơnum min mơnuih ƀôn sang să Ia Băng, tơring čar Gia Lai hmâo gơgrong hlâo pơphun hơdôm bruă jơnum mơnuih ƀôn sang, tơlơi pơhing hơdră pơtrun tuh pơplai rơwang bruă, hmư̆ tơlơi čang rơmang mơ̆ng mơnuih ƀôn sang. Kiăo tui anun, pơjing khul pơ ala glăi, hrŏm anun gum hrŏm kơjăp hăng Grŭp wai lăng rơwang bruă tuh pơplai pơdŏng tơring čar hăng anom bruă lăi pơthâo brơi hơdră mă yua măi mok pioh prăp lui hlă pŏng guai amăng blan 8/2025. Ơi Nguyễn Trường Sinh Khua Jơnum min mơnuih ƀôn sang să brơi thâo, hăng bruă mă phrâo, să dưi gum hrŏm dơlăm amăng bruă pơ ala glăi, pơsir lŏn mă yua, djru bruă pơsir tañ hloh:

“Hơdră pơptrun mơ̆ng Jơnum min mơnuih ƀôn sang tơring čar ngă tui, tui anun, tui hăng ƀing gơmơi lĕ lăp djơ̆ biă. Hăng hơdôm glông km găn nao, ƀing gơmơi amra dưi gơgrong hlâo amăng bruă lăi pơthâo nao rai hăng mơnuih ƀôn sang, ăt gêh gal hloh mơn. Amăng anun, Jơnum min mơnuih ƀôn sang tơring čar ăt đing nao mơn, črâo ba hơdôm grŭp wai lăng rơwang bruă hăng anom bruă lăi pơthâo klă gum hrŏm hăng să pioh ƀing gơmơi pok pơhai kơ bruă pơsir lŏn, pơ ala glăi, mă yua lŏn pơphun tañ hloh, lăp djơ̆ hloh hăng gal brơi tơlơi tŭ ư hrŏm amăng mơnuih ƀôn sang lu hloh".

Bơ̆ ƀơi să Mang Yang, anih hmâo 10,3km jơlan đuăi hmar Quy Nhơn – Plei Ku pơkă hlâo găn nao, hmâo rơbêh kơ 400 bôh sang anô̆ mơnuih ƀôn sang amăng rơwang khom mă lŏn, amăng anun năng ai ñu hmâo 22 bôh sang anô̆ mơnuih ƀôn sang khom pơdŏng glăi plơi pla hơđong. Ơi Võ Lê Xuân Thiện – Khua Jơnum min mơnuih ƀôn sang să Mang Yang brơi thâo, să tañ pơdŏng khul pơ ala glăi hăng grŭp wai lăng rơwang bruă gưl să, gum hrŏm hơduah ĕp lăng pel ĕp jŭ yap truh čih pơkra rơwang bruă pơ ala glăi.

“Tơdơi kơ ngă tui bruă pơ ala glăi, pơsir lŏn mă yua, hăng 22 bôh sang anô̆ pơdŏng glăi plơi hơđong, ƀing gơmơi hmâo prăp lui laih lŏn pioh pơpha pơdŏng djơ̆ tui tơlơi pơkă. Anih anom lŏn dô̆ giăm kual jơlan đuăi hmar, anun ăt amra gêh gal mơn lơm pok pơhai ngă tui”.

Rơwang bruă jơlan đuăi hmar Quy Nhơn – Plei Ku lĕ ring bruă jơlan nao rai phun dêh čar, hmâo abih bang ataih năng ai ñu 125 km găn tơring čar Gia Lai. Rơwang bruă hmâo abih bang rơnoh tuh pơplai rơbêh kơ 43.700 klai prăk, pơkă hlâo pơphun amăng rơnuč thun 2025 hăng pơkra giong thun 2029. Jơlan găn nao 17 bôh să, phường gah tơring čar Gia Lai bơdjơ̆ nao truh rơbêh kơ 3.000 bôh sang anô̆ mơnuih ƀôn sang ƀơi rơwang jơlan. Amăng anun, hmâo ha rơtuh bôh sang anô̆ mơnuih ƀôn sang kiăng pơdŏng glăi hơđong.

Ơi Nguyễn Tự Công Hoàng – Kơ-iăng Khua Jơnum min mơnuih ƀôn sang tơring čar Gia Lai pơtŏng sit, pơ ala glăi lŏn lĕ bruă mă tơnap biă, khom pok pơhai hmâo akô̆ tlôn, djơ̆ hăng bôh nik hmâo. Tơring čar hmâo prăp lui laih pơpha ngăn drăp pioh ngă tui, hrŏm hăng anun črâo ba mă yua hơdră phara ha jăn, ƀơi anăp mă glăi gơnam tam hăng anih anom dưm djah, djru pơsir tañ, giăm hăng mơnuih ƀôn sang lăp djơ̆ hăng tơlơi hmâo sit rim plơi pla. Mơ̆ng anun, bruă pơ ala glăi, gum djru, pơdŏng glăi plơi hơđong ăt dưi pok pơhai tui jơlan gah hơdeč hmar, kiăo tui tơlơi kiăng yua hăng tơlơi čang rơmang lăp djơ̆ mơ̆ng mơnuih ƀôn sang.

“Gong gai plơi pla khom ƀơi anăp hyu ĕp lăng, pơsit rơđah: hơdôm bôh sang anô̆ kiăng pơdŏng glăi plơi hơđong, hơdôm bôh pơsat kiăng rŭ đuăi, anih anom pơjing pơsat phrâo pơ̆ hơpă, tơlơi čang rơmang mơ̆ng mơnuih ƀôn sang anun hiưm ñu, lăp djơ̆ hăng anih dô̆ hơpă pơpha pơdŏng glăi plơi hơđong ƀơi anih anom anun, khom pơphun mơ̆ng tơlơi kiăng sit nik mơ̆ng mơnuih ƀôn sang. Tơdơi kơ tŭ ư laih lĕ khom apah arăng lăi pơthâo brơi mơtăm kual pơkă kual plơi phrâo pơdŏng hơđong, mă yua amăng tơlơi lăi glăi kơsem min dưi ngă tui mơ̆ng rơwang bruă jơlan đuăi hmar Quy Nhơn – Plei Ku. Abih bang hơdôm kual plơi pơdŏng glăi khom dưi mă yua anun kah mơ̆ng hmâo prăk pioh ngă tui. Kâo rơkâo bruă anai khom dưi ngă tui tañ, ječ”.

Bruă prăp lui tŏng ten kơ rơwang bruă brơi ƀuh pran pơsit mơ̆ng kơđi čar dlông mơ̆ng tơring čar Gia Lai amăng pok pơhai rơwang bruă phun, pơjing akô̆ phun tô nao rai, pơtrut pơđĭ kyar bơwih ƀong - mơnuih mơnam plơi pla pơ̆ anăp anai./.