VOV4.Jarai-Tlam lơ 20/6, ƀơi plơi prong Kon Tum, Khul mơnuih čih tơlơi pơhing phrâo tơring čar Kon Tum jơnum bưp ƀô̆ mơta hơdor glăi tal 97 thun Hrơi hră pơhing phrâo hơkrŭ Việt Nam lơ 21/6 laih anun ƀơk pri apah bơni hră pơhing phrâo tơring čar tal X thun 2022. Hră pơhing phrâo tơring čar Kon Tum tal X tŭ mă rơbêh 56 mơta tơlơi pơhing ba pơplông mơ̆ng 5 mơta tơlơi pơhing yua 22 čô mơnuih čih hăng 6 khul čih hrom ba pơplông.

Jao pri A kơ 5 čô pô čih hăng khul čih tơlơi pơhing

Amăng anun hră pơhing phrâo in hơmâo 14 tơlơi pơhing, hră pơhing internet 17 tơlơi pơhing, pơtui jua pơhiăp hơmâo 11 tơlơi pơhing, pơdah rup 11 tơlơi pơhing hăng pơdah rup đôč hơmâo 3 mơta tơlơi pơhing. Tui hăng tơlơi pơtong lăng mơ̆ng khua mua čom puang ƀơk pri lăi, hơdôm tơlơi pơhing čih djơ̆ akŏ tơlơi pơhing lăi nao, boh yôm phun amăng tơlơi pơmin, anăp ngă bruă  tui hăng Tơlơi phiăn pơphun apah pri laih anun čih lăi nao djop bruă mă. Khul khua mua čom puang apah pri hră pơhing phrâo tơring čar Kon Tum hơmâo pơsit jao 5 pri A, 5 pri B, 9 pri C hăng 8 pri pơsur pran jua.

Nay Jek: Pơblang