VOV4.Jarai - Tơring čar Kon Tum hơmâo hơdră pơsir bruă khut khăt tơdơi kơ tơlơi lăi glăi mơng VOV kơ hơdôm tơlơi soh glăi amăng bruă mă čuah ƀơi ia krông Pô Kô, anih găn nao pơ plơi Kà Nhảy, să Đăk Nông tơring glông Ngọc Hồi hăng ƀơi ia krông Đăk Pxi, gah thôn 7, să Đăk Pxi, tơring glông Đăk Hà. Lăp đing nao, Gơnong bruă wai lăng kông ngăn lŏn tơnah hăng ayuh hyiăng tơring čar Kon Tum brơi glăi laih hră pơ-ar rơkâo jao glăi tơlơi dưi mă yua čuah, pơtâo rơga pioh man pơkra anih anom, ƀơi luh mă pơtâo čuah ia krông Đăk Pxi, thôn 7, să Đăk Pxi, tơring glông Đăk Hà. Tŏng ten amăng hră mơ-it Grup mă bruă hyu hơduah ĕp kơđi tơlơi, wai lăng bruă mă pơtâo čuah ƀơi tơring čar Kon Tum, Gơnong bruă wai lăng kông ngăn lŏn tơnah hăng ayuh hyiăng, Anom bruă Jơnum min mơnuih ƀon sang tơring čar Kon Tum hơmâo jao kơ grup ngă bruă git gai, ngă hrŏm hăng Gơnong bruă wai lăng jơlan hyu pel ĕp, ngă rơđah tơlơi lăi glăi mơng ƀing hyu mă tơlơi pơhing phrâo, pơsir hĭ tơlơi soh tơdah hơmâo, tui tơlơi dưi, tơlơi phiăn kơnuk kơna ta.

Anom bơwih ƀong bơbôr jơlan tong krah ia krông Đăk Pxi či mă čuah, samơ̆ Jơnum min mơnuih ƀon sang să Đăk Pxi lăi ƀu thâo ôh, laih anun Anom bruă Kông ngăn lŏn tơnah hăng ayuh hyiăng tơring glông Đăk Hà kơnong pơtă đôč.

Siu H’Mai: Pơblang