Tơring glông Đức Cơ hơmâo akŏ pơjing Khul git gai pơtô brơi ƀing aka ƀu thâo hră ƀơi hơdôm boh ƀon lan, jao brơi bruă mă brơi ƀing ding kơna tui rĭm boh ƀon lan phara; pơphun kiăo tui lăng, pel ĕp, djru brơi hơdôm boh ƀon lan tơnap tap. Rơbêh 3 blan anai, rĭm mơmŏt, anih pơtô hrăm ƀơi sang hră gưl I Trần Phú, să Ia Dom, tơring glông Đức Cơ rơđah bang hăng hmư̆ ƀơƀruk arăng pơđok hră.

Anih pơtô hơmâo giăm 40 čô mơnuih lĕ mơnuih djuai ania ƀiă rai mơng hơdôm boh plơi pla amăng să Ia Dom, tơring glông giăm guai Đức Cơ, tơring čar Gia Lai. Amăng rơwang thun 2021-2025, ngă tui Jơlan hơdră tui hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng, tơring čar Gia Lai ba tơbiă hơnong pơkă pok 735 anih pơtô hrăm ƀơi hơdôm boh tơring glông, plơi prong brơi rơbêh 23.000 čô mơnuih hăng prăk mă yua 47 klai prăk.