VOV4.Jarai - Kơ-iăng Khua dêh čar Lê Văn Thành phrâo kĭ tơlơi pơtrun mrô 461/QĐ-TTg tŭ yap hơdôm bruă jao dưm dăp man pơdong amăng kual Dap kơdư rơwang thun 2021-2030, anăp nao thun 2050. Hơnong pơkă mơng bruă akŏ pơjing bruă dưm dăp man pơdong lĕ ngă tong ten hơdră bruă, bruă jao hăng hơdră bơwih ƀong huă-mơnuih mơnam hăng kual Dap kơdư anun lĕ: Ba glăi tŭ yua mơng hơdôm phun pla sui thun, phun akha kyâo, pơjing hơdôm hơdră pơlir hơbit bơwih ƀong huă, pơkra pơjing, djă pioh hăng ba sĭ mơdrô, pơjing anăn apăn sĭ mơdrô mơng gơnam ba sĭ pơ tač rơngiao; đing nao hơkrŭ hăng pơđĭ kyar bơwih ƀong mơng glai rưng; pơđĭ kyar pơkra pơjing apui lơtrik phrâo; pơđĭ kyar hơdôm anih bơwih brơi tuai čuă ngui pơprong, pơjing hơdôm ară jơlan čuă ngui ƀơi kual Dap kơdư; hơmâo lu dong mơnuih mă bruă thâo rơgơi; hơđong tơlơi hơdip mơnuih ƀon sang, đing nao djă pioh hăng hơkrŭ glăi gru grua yôm phara mơng djop djuai ania ƀơi kual Dap kơdư; man pơkra jơlan rơdêh đuăi hmar hăng man pơkra jơlan amăng kual, hơdôm ară jơlan pơkuh nao rai mơng kual Dap kơdư nao pơ kual Ngŏ Dơnung, ter hang ia rơsĭ kual Dơnung tong krah hăng kual Dơnung Lào hăng Ngŏ kơdư Kur.

Siu Đoan: Pơblang