VOV4.Jarai - Ƀơi anăp bôh tơhnal klă mơng bruă lông lăng čơkă tuai mơng dêh čar tač rơngiao nao čuă ngui, tơdơi rơbêh kơ 2 blan pok pơhai, Ding jum bôh thâo, bơkơjăp drơi jăn hăng tuai čuă ngui dêh čar ta hmâo tŭ ư hăng hơdôm ding jum gơnong bruă hăng tơring čar, ƀôn prong kơ glông jơlan pok anih anom tuai dêh čar tač rơngiao rai čuă ngui mơng blan 5 pơ̆ anăp. Yap mơng blan 11 thun 2021 truh ră anai, Việt Nam hmâo čơkă laih 8500 čô tuai dêh čar tač rơngiao nao pơ̆ 3 anih anom lĕ Phú Quốc, Khánh Hòa, Quảng Nam. Abih bang tuai čuă ngui rai pơ̆ Việt Nam leng kơ hmâo tơlơi lăi glăi klă, bruă čơkă tuai pơhlôm. Mơng bôh tơhnal anun, Ding jum bôh thâo, bơkơjăp drơi jăn hăng tuai čuă ngui dêh čar ta hmâo ba tơbiă glông bruă pok bah amăng tuai čuă ngui, čơkă tuai dêh čar tač rơngiao rai pơ̆ dêh čar Việt Nam hăng ba tuai hyu čuă ngui mơng blan 5/2022 găn rơgao hơdôm bah amăng guai lŏn ia amăng rơnuk hơđong phrâo. Tui hăng hơdôm bôh anom bơwih ƀong, bruă lăi pơthâo tañ hơdôm hrơi pok bah amăng anih anom tuai čuă ngui amra djru ngă pơhưč tuai mơng lu anih anom rai čuă ngui. Ră anai hmâo 20 bôh anih anom lĕ kual phun tuai čuă ngui ba tơbiă, hơdôm ding jum gơnong bruă djru dong kiăng hơdôm anih anom anai gơgrong hlâo ruah mă anom čơkă tuai dêh čar tač rơngiao./.

Siu H’ Prăk: Pơblang