VOV4.Jarai-Việt Nam phrâo djơ̆ anăn arăng ruah ngă ding kơna Jơnum min pơlir kơnuk kơna-tơlơi phiăn git gai, krăo lăng ngă tui Hră pơkôl thun 2003-rơwang bruă thun 2022-2026 mơ̆ng UNESCO, hăng hră plĕ ruah lu biă mă. Anai lĕ boh tơhnal mơ̆ng jơnum Khul lu dêh čar ngă ding kơna Hră pơkôl Pơgang pioh gru grua hiamia rơgơi đưm mơ̆ng UNESCO tal 9 ƀơi Paris. Amăng abih bang 12 boh dêh čar dưi ruah ngă ding kơna pơhrua  brơi rơwang bruă thun 2022-2026, hơmâo pă boh dêh čar kual ASIA-Thái Bình Dương anun lĕ, Việt Nam, Malaysia, India hăng Bangladesh.

Jơnum min pơlir kơnuk kơna Hră pơkôl thun 2003 hơmâo 24 boh dêh čar ngă ding kơna, jing anom bruă git gai phun mơ̆ng UNESCO pơgang gru grua hiam đưm, glăm ba bruă mă krăo lăng ngă tui hră pơkôl, rơkâo ngă tui hơdôm hơdră pơgang pioh gru grua hiam đưm ngă mơak pran, djru jar kmar, sem lăng hră pơar rơkâo čih anăn pơpŭ djă pioh….pioh kơ Khul djop dêh čar Hră pơkôl pơsit. Anai lĕ tal 2 Việt Nam ngă bruă anai ƀơi anom bruă git gai phun gru grua hiam mơ̆ng UNESCO.

Nay Jek: Pơblang