VOV4.Jarai - Tŏ tui hơdôm bruă mă črâo ba sĭ mơdrô pơ tač rơngiao gơnam đang hmua Việt Nam, mơguah (22/7), Anom bruă pơsur sĭ mơdrô (Ding jum sĭ mơdrô) gum hrŏm hăng hơdôm anom bruă sĭ mơdrô Việt Nam pơ tač rơngiao hăng gơnong bruă sĭ mơdrô hăng tuh tia pơkra pơjing tơring čar Dak Lak pơphun tal jơnum črâo ba sĭ mơdrô pơ tač rơngiao boh sầu riêng Việt Nam. Đơ đam dêh čar ră anai hơmâo giăm 85.000 ektar, pơhrui rĭm thun giăm 670.000 tơ̆n. Him lăng truh thun 2025 pơhrui 1 klăk tơ̆n. Dak Lak hăng Tiền Giang lĕ 2 boh tơring čar hơmâo lŏn pla hăng pơhrui sầu riêng lŭ hloh amăng đơ đam dêh čar.

Sầu riêng juăt ba sĭ mơdrô pơ tač rơngiao lĕ sầu riêng arăng pơkra dưm amăng anih rơ-ơ̆ hlâo kơ ba sĭ mơdrô pơ dêh čar Khač, Đài Loan, laih dong hơmâo ƀiă ba sĭ pơ dêh čar Japan. Amăng mông jơnum, ƀing rơgơi kơhnâo, ƀing pơ ala brơi hơdôm  anom bruă sĭ mơdrô Việt Nam ƀơi Khač, Đài Loan, Japan, Australia, Thái Lan pơtă pơtăn hơdôm anom bruă sĭ mơdrô Việt Nam kơ bruă ba sĭ mơdrô, bruă pơhlôm gơnam hiam hơdjă, duh prăk, pơdŭ pơgiăng, hră pơhlôm gơnam, pơsir hĭ hơdôm bruă aka ƀu klă lơ̆m ba sầu riêng sĭ pơ tač rơngiao.

Siu Đoan: Pơblang