VOV4.Jarai - Tŏ tui hơdôm hrơi nao čuă hăng mă bruă ƀơi Mi, Khua dêh čar ta ơi Phạm Minh Chính hơmâo mông bưp ơi John McAuliff, sa čô gơyut sui thun, jê̆ giăm hăng dêh čar Việt Nam hăng lĕ khua pơ ala brơi dêh čar Mi dong yua kơ bruă djru mơnuih djơ̆ jrao hret ƀơi Việt Nam. Amăng mông bưp, Khua dêh čar ta brơi thâo sa amăng hơdôm hơnong pơkă amăng tal nao čuă Mi lĕ pơtrut rŭ pơkra tơlơi truh sat mơng rơnuk blah wang.

Amăng thun blan laih rơgao, hăng pran jua “lui hĭ tơlơi sat sô hơđăp, anăp nao pơgi kơdi”, Việt Nam hăng Mi hơmâo tŏ tui pơtrut hơdôm hơdră pơsir klă hloh, sit nik ƀiă dong kiăng pơsir hĭ tơlơi sat răm mơng rơnuk blah wang. Khua dêh čar pơdah pran pơpŭ bơni ơi John McAuliff hăng ƀing gơyut gơyâo pơkŏn yua hơdôm tơlơi gir run mơng ƀing gơñu amăng bruă pơtom hiăp hăng dêh čar Việt Nam amăng rơma pluh thun laih rơgao, pơgôp kiăng rŭ pơkra hơdôm tơlơi sat răm mơng rơnuk blah wang ƀơi Việt Nam; sit biă ñu pơdah pran khăp pap abih pran jua kiăng kơ djru brơi ƀing mơnuih djơ̆ jrao hret.

Siu Đoan: Pơblang