VOV4.Jarai - Tlam (8/6), Khua dêh čar ơi Phạm Minh Chính tŭ jum Khua ding jum ling tơhan dêh čar India Rajnath Singh glăk rai čuă sit nik dêh čar Việt Nam. Amăng mông bưp, Khua dêh čar ta pơsit tong Ping gah, Kơnuk kơna hăng mơnuih ƀon sang Việt Nam lăng yôm biă mă hăng čang rơmang pơtrut pơđĭ kyar tơlơi rô nao rai, giang mah, gru grua, ngă hrŏm djop mơta kơplah wah Việt Nam - India hluai tui akŏ phun mơng tơlơi pơlir hơbit gru grua mơng đưm hlâo, hơdôm tơlơi yôm hăng tơlơi dưi bơkơnar, tơlơi đăo gơnang hăng thâo hluh tơdruă, kah hăng tơlơi ƀuăn hrŏm hăng tơlơi phăn jar kmar.

Amăng mông bưp, dua bơnah hơmâo pơlăi nao rai hơdôm bruă amăng kual hăng jar kmar dua boh dêh čar đing nao, tŭ ư kơtưn pơlăi nao rai, gum hrŏm amăng hơdôm mông jơnum djop bơnah, ngă hrŏm wai pơgang rơnuk rơnua mơng Sang gum hơbit djop dêh čar, pơtrut tơlơi rô nao rai ASEAN - India, lăi pơtong tơlơi gơgrong phun mơng kual ASEAN amăng wai pơgang rơnuk rơnua amăng kual. Dua bơnah lăi nao tơlơi yôm phăn mơng bruă pơhlôm rơnuk rơnua, rơngai amăng kual ia rơsĭ kah hăng rơngĭt adai ƀơi kual ia rơsĭ Ngŏ; pơsir hĭ hơdôm bruă bơrơsua hăng jơlan gah rơnuk rơnua tui tơlơi phiăn jar kmar.

Siu Đoan: Pơblang