VOV4.Jarai-Mơguah lơ 26/8, ƀơi Anom bruă Kơnuk kơna, Kơ-iăng khua dêh čar ơi Vũ Đức Đam hơmâo tŭ jum yă Caitlin Weisen, khua pơ ala Hơdră Pơđĭ kyar mơ̆ng Sang gum hơbit djop dêh čar UNDP ƀơi Việt Nam, nao mă tơngan ƀrô pơđut thun blan mă bruă ƀơi Việt Nam. Ơi Vũ Đức Đam lăi pơtong, Kơnuk kơna Việt Nam lăng yôm biă mă tơlơi gơgrong mơ̆ng Hơdră Pơđĭ kyar Sang gum hơbit djop dêh čar UNDP amăng bruă djru pơđĭ kyar amăng rŏng lŏn tơnah hăng hok mơak ƀơi anăp bruă mă ngă hrom hiam klă  kơplah wah Việt Nam hăng UNDP lu thun rơgao.

Kơ-iăng khua dêh čar rơkâo UNDP ăt ngă hrom anom bruă WHO hăng lu anom bruă jar kmar pơkŏn kơtưn djru gah bruă ia jrao, hơdră pơhlôm klin kheng, djru Việt Nam pơđĭ tui tơlơi thâo kiăng bong glăi hăng klin kheng pơ anăp adih; djru Việt Nam lăng glăi hăng pơtrut ngă tui lu Tơhnal pơtrun Pơđĭ kyar hơđong kjăp.

Nay Jek: Pơblang