VOV4.Jarai-Mơguah lơ 18/7, ƀơi Hà Nội jơnum ngă lơphet hơdor glăi tal 60 thun hrơi akŏ pơjing bruă pơtom hiăp Việt Nam-Lao hăng 45 thun kĭ pơkôl Hră ngă giăng mah dua bơnah dêh čar. Khua git gai ping gah, ơi Nguyễn Phú Trọng hăng Khua gum bruă git gai ping gah, Kơ-iăng khua mir sir dêh čar Lao, ơi Bounthong Chitmany git gai hrom jơnum ngă lơphet.

Hơdor glăi tal 60 thun hrơi akŏ pơjing bruă pơtom hiăp hăng 45 thun hrơi kĭ hră pơkôl giăng mah ngă hrom Việt Nam-Lao dưi lăng kah hăng gru phun yôm tơlơi gơyut gơyâo giăng mah dua bơnah, gum pơgôp yôm phara hăng ngă hrom hlom bom Việt Nam-Lao; jing mông gêh găl kơ dua bơnah hrom hơbit hơdor glăi gru phun hing ang mơ̆ng bruă ngă hrom ƀing gŏp gum pơgôp Việt Nam-Lao blah ayăt, tơlơi gum djru nao rai tơpă ară hăng sit nik, hlâo tơdơi jing sa pran jua mơ̆ng Ping gah, dua bơnah kơnuk kơna hăng mơnuih ƀôn sang amăng rơnuk blah ayăt đưm hlâo. Anai lĕ, bruă mă kơtưn kiăng pơtô hrăm djop gưl mơnuih ƀôn sang, biă mă ñu hlăk ai čơđai muai  thâo kơ boh yôm tŭ yua amăng bruă ngă giăng mah dua bơnah Việt Nam-Lao.

Nay Jek: Pơblang