Anun lĕ tơlơi pơtong sit mơ̆ng Khua ding jum Bruă hmua dêh čar Mi, ơi Thomas Vilsack ƀơi mông bưp nao rai hăng ƀing čih tơlơi pơhing či tlam lơ 19/4 ƀơi Hà Nội, ƀrô tal rai čuă jơmư Việt Nam. Tal rai čuă jơmư anai, jing bruă mă hơdor glăi 10 thun akŏ pơjing bruă ngă hrom hlom bom Việt Nam-Mi, anăp nao ngă kjăp tui bruă rô nao rai dua bơnah, laih dơ̆ng ngă dơlăm hloh bruă sĭ mơdrô dua bơnah.

Ƀơi mông bưp hăng ƀing čih tơlơi pơhing, Khua ding jum bruă hmua dêh čar Mi, ơi Thomas Vilsack lăi pơtong, tơlơi rô nao rai kơplah wah Việt Nam hăng Mi jai hrơi kjăp aka ƀu hơmâo djơ̆ ôh, biă mă ñu dơ̆ng mơ̆ng hrơi dua bơnah akŏ pơjing bruă mă tong ten hlom bom. Kơ bruă pok prong sĭ mơdrô dua bơnah, gah bruă ngă hmua, ơi Vilsack hơmâo ngă bruă hăng lu anom bruă pơdjơ̆ nao kiăng ĕp anŏ gêh găl sĭ mơdrô lu mơta gơnam phrâo mơ̆ng dêh čar Mi ba rai pơ Việt Nam hăng mơ̆ng Việt Nam ba nao pơ dêh čar Mi.