Khua Ding jum kơčăo bruă hăng tuh pơplai dêh čar ta, ơi Nguyễn Chí Dũng – Khua Grŭp Việt Nam phrâo nao pơhmư̆ mông Bơkơtuai bruă kơđi čar gưl dlông kơ pơđĭ kyar kơjăp phik mơ̆ng Sang gum hơbit djop dêh čar – lăi pơdah hơdôm tơhnal pơkă pơđĭ kyar kơjăp phik thun 2023 mơ̆ng Việt Nam hăng mă bruă hăng hơdôm ƀirô Gong gai, khul grŭp, anom bơwih ƀong, keh prăk tuh pơplai, grŭp bơwih ƀong prong mơ̆ng Mi kiăng pơtrut gum hrom pơplih phrâo pơčeh phrâo hăng hơdră phrâo măi mok; kơsem min, lăi pơthâo nao rai tơlơi găn rơgao hăng pơhưč ngăn drăp pơdŏng anih phun prăk kak jar kơmar; pơtrut hăng ngă pơhưč tuh pơplai hơdôm rơwang bruă hơdră phrâo măi mok yôm.

Tơlơi lăi pơthâo glăi mơ̆ng Việt Nam lăi pơdah amăng mông Bơkơtuai hmâo pơtŏng sit tơlơi pơkôl mơ̆ng Việt Nam ngă tui dong bruă mă lĕ ding kơna hmâo bruă gơgrong, gum hơgôp klă amăng hơdôm tơlơi gir run hrŏm mơ̆ng jar kơmar. Tơhnal pơkă mơ̆ng Tơlơi lăi pơthâo glăi tal 2 kiăng lăi pơthâo rơnoh ngă tui hơdôm tơhnal pơkă pơđĭ kyar kơjăp phik; hơdôm pơplih hăng rơnoh yôm phăn bơhmu hăng tal sa; hơdôm tơlơi tơnap, tơlơi lông ba tơbiă hăng pơsit jơlan gah yôm phăn kiăng pơtrut bruă ngă tui hơdôm tơhnal pơkă pơđĭ kyar kơjăp phik pơ̆ anăp anai./.