Amăng hơdôm hrơi rơgao, lơm hmư̆ hing ơi Nguyễn Phú Trọng, Khua git gai Ping gah Cộng sản Việt Nam rơngiă, Khua mua hơdôm boh dêh čar, khul grup jar kmar, djop Ping gah hăng gơyut gơyâo mơng 103 boh dêh čar, kual lŏn hăng 32 khul grup jar kmar hơmâo mơ-it nao 500 hră pơ-ar, kông điêng, tơlơi hning rơngŏt hrŏm Khul apăn bruă Ping gah Cộng sản Việt Nam, Khua mir sir Việt Nam ơi Tô Lâm, Khua dêh čar ơi Phạm Minh Chính, Khua git gai pơ ala mơnuih ƀôn sang dêh čar ơi Trần Thanh Mẫn, Ding kơna Khul git gai Ping gah Cộng sản Việt Nam ơi Lương Cường, kah hăng Khua mua Ping gah, kơnuk kơna pơkŏn, abih bang mơnuih ƀôn sang Việt Nam hăng sang anŏ Khua git gai Ping gah dêh čar ơi Nguyễn Phú Trọng. 100 khul grup jar kmar hơmâo nao hơ-ŭ hơdor hăng mơ-it nao guang bơnga pơ dêh čar Việt Nam hăng rơbêh 3.500 khul grup hơmâo nao hơ-ŭ hơdor kơ Khua git gai Ping gah dêh čar ơi Nguyễn Phú Trọng ƀơi hơdôm sang bruă anih jưh pơ ala dêh čar Việt Nam pơ tač rơngiao.

Amăng hră mơ-it hning rơngŏt hrŏm, Khua mua hơdôm boh dêh čar, khul grup jar kmar, djop Ping gah hăng gơyut gơyâo jar kmar hơmâo tơlơi hơ-ŭ hning rơngŏt hrŏm hăng lăng yôm hơdôm tơlơi pơgôp prong prin mơng Khua git gai Ping gah dêh čar ơi Nguyễn Phú Trọng hăng bruă pơđĭ kyar mơng Việt Nam hăng tơlơi rô nao rai kơplah wah Việt Nam hăng hơdôm boh dêh čar ngă gŏp, čang rơmang tŏ tui pơtrut ƀiă dong tơlơi ngă hrŏm hăng Việt Nam amăng djop mơta bruă. Pơpŭ hơ-ơč pran gum pơgôp, thâo pap nao rai mơng hơdôm boh dêh čar, bơnah ngă gŏp, djop Ping gah hăng gơyut gơyâo jar kmar, khua mua Ping gah, Kơnuk kơna hăng gơyut gơyâo jar kmar, pơpŭ bơni pran khăp yôm phăn hăng tơlơi tơña bla, juh alum mơng Ping gah, Kơnuk kơna, mơnuih ƀôn sang Việt Nam hăng sang anŏ Khua git gai Ping gah dêh čar ơi Nguyễn Phú Trọng. Ƀing khua mua Ping gah hăng Kơnuk kơna čang rơmang hrŏm hăng djop dêh čar, bơnah ngă gŏp tŏ ngă tui tơlơi čang rơmang mơng Khua git gai Ping gah ơi Nguyễn Phú Trọng ba tơlơi rô nao rai giang mah, ngă hrŏm kơplah wah Việt Nam hăng hơdôm boh dêh čar jai hrơi pơđĭ kyar, jai dơlăm tui, djơ̆ hăng tơlơi dưi mơng rĭm boh dêh čar hăng pơgôp amăng bruă pơgang rơnuk rơnua, ngă hrŏm, pơdrong asah amăng kual hăng rŏng lŏn tơnah.