Kiăng djru ba ƀing čơđai pơ kual ataih asuek hơmâo gơnam ngui bơwih brơi bruă hrăm hră amăng thun hrăm phrâo, lơ 14/6, Khul mut phung Gong phun pơtui jua pơhiăp dêh čar Việt Nam pơdong ƀơi kual Dap Kơdư ngă hrŏm hăng hơdôm anom bruă juăt djru mơnuih mơnam hơmâo brơi 600 gơnam ngui dưm truă kơ ƀing čơđai sang hră muai mơng tơring glông Lăk, tơring čar Dak Lăk.

600 gơnam ngui dưm truă rup sang kyâo MULA-IKEA hơmâo pơkra hăng hơnal kyâo, pik ia acrylic hăng kơsu Polypropylen. Prăk blơi giăm 240 klăk prăk. Yă Hoàng Thị Thắm, gơgrong bruă sang hră anih muai mơng Anom bruă pơtô hăng pơjuăt tơring glông Lăk, tơring čar Dak Lăk brơi thâo, tơring glông Lăk hơmâo 13 boh sang hră muai, amăng anun 12 boh sang hră yua kơnuk kơna pơdong hăng 1 boh sang hră yua mơnuih ƀon sang pơdong hăng rơbêh 4 rơbâo čô čơđai, amăng anun čơđai djuai ƀiă hơmâo rơbêh 50%. Hơdôm mơta gơnam VOV Dap Kơdư brơi, amra djru ƀing čơđai hơmâo tơlơi ngui ngor, ngă brơi čơđơi pơmin rơgơi hloh.