Lơ 15/6, tô̆ tui tal nao mă bruă ƀơi hơdôm bôh tơring čar kual Tŏng Krah dêh čar, ơi Đỗ Tiến Sĩ, Khua Gong phun jua pơhiăp dêh čar Việt Nam (VOV) ba jơlan hlâo grŭp hyu mă bruă mơng VOV mă bruă hăng ơi Nguyễn Hải Ninh, Khua git gai Ping gah tơring čar Khánh Hòa hăng hơdôm gơnong bruă bơdjơ̆ nao črông sai bruă gum hrom pơphun jơlan hơdră pơblang bôh thâo “Kơtang, pơdrŏng mơng ia rơsĭ plơi pla”.

Jơlan hơdră pơblang kơ bôh thâo “Kơtang, pơdrong mơng ia rơsĭ plơi pla” yua kơ Gong phun jua pơhiăp dêh čar Việt Nam gum hrom hăng Grŭp pơtô bruă Ping gah dêh čar, Anom apăn bruă kơđi čar Khul ling tơhan dêh čar Việt Nam – Ding jum Khul ling tơhan hăng Jơnum min mơnuih ƀôn sang tơring čar Khánh Hòa pơphun. Jơlan hơdră sui 90 mơnit, pơkă lăng hlâo pơphun amăng mơmot lơ 15/8/2023 ƀơi tơdrông toa Sang bruă pơtô bruă tơhan ia rơsĭ, plơi prong Nha Trang. Anai lĕ jơlan hơdră hmâo hơdră pơkă gah dêh car. Bôh yôm jơlan hơdră đing nao lăng glăi bôh tơhnal ngă tui Tơlơi pơtrun pơsit jơnum prong tal 13 mơng Ping gah amăng hơdôm kual ia rơsĭ, bul ia rơsĭ mơng akô̆ rơwang bruă truh ră anai. Jơlan hơdră pơblang bôh thâo “Kơtang, pơdrŏng mơng ia rơsĭ plơi pla” por hyu tơlơi pơhing pơtŏng sit pran jua khăp kơ ia rơsĭ dơlăm mơng mơnuih ƀôn sang Việt Nam; tơlơi čang rơmang pơđĭ kyar bơwih ƀong ia rơsĭ Việt Nam, pơgang pô ia rơsĭ, bul ia rơsĭ lŏn ia...