Đĭ pơhiăp amăng mông ngă lơphet, Khua phun Gong phun jua pơhiăp dêh čar Việt Nam ơi Đỗ Tiến Sỹ lăi pơthâo glăi gru grua akŏ pơjing Gong phun jua pơhiăp dêh čar Việt Nam, sui mơng anai 79 thun, kơnong 5 hrơi tơdơi kơ Khua mir sir Hồ Chí Minh pơđok hră pơsit rơngai hăng abih bang mơnuih ƀôn sang laih dong jar kmar akŏ pơjing dêh čar Việt Nam Dân chủ cộng hoà, krĕp 11 mông 30 mơnit lơ 7/9/1945, Gong phun jua pơhiăp dêh čar Nam (VOV) sit nik akŏ pơjing hăng mông pôr pơhing blung a hăng tơlơi Yuăn, Angle hăng Prang hăng tơlơi pơđok pok blung jơlan hơdră“Đây là tiếng nói của Việt Nam, phát thanh từ Hà Nội, thủ đô nước Việt Nam dân chủ cộng hòa”. 

Amăng dua rơnuk blah ayăt Prang hăng Mi, Gong phun jua pơhiăp dêh čar Việt Nam hơmâo hyu kơđăp 14 wŏt kiăng pơhlôm brơi glông pôr pơhing lŏn ia. Găn rơgao 79 thun prong kơtang hăng pơđĭ kyar, djop rơnuk mơnuih apăn bruă, ƀing mă tơlơi pơhing, ƀing mă jua pơhiăp, ƀing adôh suang hăng mơnuih mă bruă mơng Gong phun jua pơhiăp dêh čar Việt Nam hơmâo ha pran găn rơgao tơnap tap kiăng akŏ pơjing Gong phun jua pơhiăp dêh čar Việt Nam hơđong kjăp tui tơlơi đăo gơnang mơng Ping gah, abih bang mơnuih ƀôn sang. Gong phun jua pơhiăp dêh čar Việt Nam jing “jua pơhiăp kơ lŏn ia”, kơ tơlơi rơngai, ngă pô, jing jua pơhiăp mơng Ping gah, Kơnuk kơna hăng mơnuih ƀôn sang Việt Nam, jing gơyut gơyâo đăo gơnang mơng jar kmar.