VOV4.Jarai - Dong mơng hrơi klin Covid-19 gluh đĭ, mơnuih apăn bruă tơhan, ling tơhan pơgang guai tơring čar Daklak gir run na nao yak rơgao hơdôm tơlơi tơnap, lui bruă pô kiăng ngă tui klă “dua mơta bruă”: Pơgang rơnuk rơnua rah guai lŏn ia hăng pơgang hlôm hlâo rah klin ruă. Tơlơi anai jai ngă jă tui gru rŭp ling tơhan pơgang guai lŏn ia ƀơi tơring čar Daklak.

Amăng krah pơ-iă hang blan 3 Dăp Kơdư, ƀơi plơi Nhạp, să Ia Lốp, tơring glông Ea Sup, tơring čar Daklak, mơnuih apăn bruă tơhan, ling tơhan pơgang guai lŏn ia Ea Hleo ăt hyu tir tơpă mơn pơgang rơnuk rơnua guai lŏn ia, wai lăng bruă pơgang pơgăn klin ruă Covid-19. Trung tá Nguyễn Thanh Tú, Kơ-iăng Khua grŭp hyu pel ĕp, Puih kơđông pơgang guai lŏn ia Ea Hleo dô̆ gak plơi Nhạp lăi pơthâo: Hmâo hrơi đa klin ruă gluh đĭ kơtang, ană ñu glăk hrăm pơ̆ ƀôn prong Hồ Chí Minh ƀă Covid-19 ƀu hmâo mơnuih mơng sang anô̆ dô̆ giăm. Bơnai pơ̆ sang duam ruă na nao, samơ̆ ñu ăt gum hrom hăng grŭp mơn dô̆ găk wai lăng guai dêh čar, lu blan ƀu hmâo glăi pơ̆ sang pioh ngă giong bruă jao.

“Ăt bơngot mơn yua kơ ană bă tui anun mơ̆, pô ƀu hmâo mơnuih mơng sang anô̆ pơ̆ anai. Bruă dô̆ čơlah mơng ñu hiưm hơpă, tơbiă mơng sang ia jrao hiưm hơpă, hơdră pơjrao hiưm ñu, glông hơdră hiưm hơpă kâo ƀu thâo ôh, kâo ƀu ƀơi anăp pơ̆ anun, anun yơh bơngot biă. Samơ̆ khom ngă bruă jao mơng pô lĕ blung a dô̆ pơsur ană bơnai ngă hiưm hơpă gir run yak rơgao rơwang tơnap tap yua kơ tơlơi tơnap tap anun lĕ tơnap tap hrom”.

Ling tơhan pơgang guai lŏn ia Daklak hyu tir pơgang guai lŏn ia

Sang dô̆ ataih mơng puih kơđông rơbêh kơ 40 km, samơ̆ yua kơ bruă mă Trung uý Hà Văn Tân, mơnuih mă bruă mơng Grŭp pơsur mơnuih ƀôn sang Puih kơđông pơgang guai lŏn ia Ea Hleo djơ̆ anô̆ ñu ha mơkrah thun ƀu glăi čuă sang. Trung tá Tân lăi pơthâo: Ră anai bơnai ñu glăk F0, ană anet 17 blan khom ba nao pơ̆ yă ñu lăng ba. Khă hning kơ ană bơnai samơ̆ ñu ăt dô̆ glăi ƀơi puih kơđông mơn pioh mă bruă.

“Phun ñu bơnai kâo ăt thâo hluh mơn, anun păp ñai brơi hăng kâo. Kâo ăt hning mơn ană bơnai khă ƀu ataih mơn samơ̆ hmâo hrơi klin ngă tal hlâo truh kơ 3 blan ƀu glăi pơ̆ sang. Hăng drơi pô kâo dong mơng phun nao hrăm lĕ, pơsit pran jua mă ling tơhan ngă bruă anun pơsur mă pran jua pô khom gir run kiăng ngă giong klă djop bruă dưi jao”.

Ling tơhan pơgang guai lŏn ia Daklak pơsit pran jua djă kơjăp rơnuk rơnua guai lŏn ia pô

Lom gum hrom hăng grŭp mă bruă ƀơi guai lŏn ia, Trung uý Nông Văn Lợi, ƀơi Puih kơđông pơgang guai lŏn ia Ia R’vê hmư̆ hing lăi ama ñu ƀă Covid-19 rơngiă pơ̆ Bình Dương amăng hơdôm hrơi klin ngă kơtang hloh. Trung uý Lợi ruai glăi: Hmư̆ hing lăi ama kâo rơngiă kâo ruă pran jua biă. Samơ̆ lom anun klin ngă kơtang hăng drơi pô kâo glăk mă bruă ƀu dưi glăi jôk.

“Lom dô̆ găk pơgăn Covid-19 hmư̆ hing lăi ama kâo djai pơ̆ Bình Dương. Tơlơi pơmin ăt bơngot mơn, ol kơdol biă samơ̆ kâo dưi hmâo adơi ayong, Grŭp git gai bruă puih kơđông, Ƀirô git gai iâu telephone juh alum. Laih anun kâo dô̆ mă bruă sui laih amăng khul ling tơhan anun tơlơi pơmin kơjăp, ăt pơsit bruă mă tui anun laih, dưi glăi lĕ djru sang anô̆ ƀiă, bơ̆ ƀu dưi glăi lĕ iâu telephone rơkâo sang anô̆ păp ñai brơi”.

Trung tá Hà Văn Tân iâu telephone tơña bla ană bơnai lom dô̆ pơdơi

Dua thun rơgao, ngă tui bruă pơgang klin hăng pơgang guai lŏn ia, hơdôm bôh puih kơđông pơgang guai lŏn ia ƀơi Daklak hmâo pơphun rơbêh kơ 5.000 grŭp, khul hăng giăm truh 33.000 wot čô mơnuih apăn bruă tơhan, ling tơhan gum hrom hyu tir, wai lăng guai lŏn ia. Hrom hăng anun, djă pioh na nao 9 anih dô̆ gak wai lăng pơgang, pơgăn klin Covid-19. Rơgao bruă hyu tir, wai lăng ling tơhan pơgang guai lŏn ia tơring čar Daklak thâo ƀuh, mă pơkŏng hăng pơsir 18 mơta tơlơi kơđi hăng 57 čô mơnuih ngă soh tơlơi rơnuk rơnua ƀơi guai lŏn ia.

Tui hăng Trung tá Nguyễn Văn An, Khua Puih kơđông pơgang guai lŏn ia Ia R’vê: Ngă tui bruă mơng Ƀirô git gai, puih kơđông hmâo wai lăng, pơgăn hơdôm bruă mut tơbiă ƀu djơ̆ phiăn, hrom hăng anun, ƀu pioh klin Covid-19 lar hyu.

“Mơnuih apăn bruă tơhan, ling tơhan mơng puih kơđông pơsit na nao bruă pơgang rơnuk rơnua guai lŏn ia nao hrom hăng pơgang pơgăn klin Covid-19 hăng pơsit pơgăn klin kah hăng pơgăn ayăt. Yua anun, ƀing gơmơi pơsur mă pran jua pô, pơtô juăt kiăng pơđĭ tui tơlơi pơmin, pran jua, bruă gơgrong hơkrŭ glăi djop tơlơi tơnap. Khă tơlơi hơdip mơda, anom ƀơi hơdôm anih dô̆ gak ƀơi guai lŏn ia tơnap tap pơ-iă hang, phang khôt, sang dô̆ jăng jai. Samơ̆ hăng rim čô ling tơhan leng kơ thâo pran jua gơgrong ngă klă bruă dưi jao”.

Tơring čar Daklak hmâo 7 bôh puih kơđông dưi jao bruă wai lăng, pơgang rơbêh kơ 71 km jơlan guai dêh čar giăm hăng tơring čar Mondulkiri (Kur). Kual guai lŏn ia ƀơi Daklak hmâo lu jơlan amur, jơlan pok hmâo lu tơlơi huĭ rơhyư̆t yak rơgao guai lŏn ia, mut tơbiă ƀu djơ̆ phiăn ngă lar hyu klin Covid-19 tui jơlan guai dêh čar. Samơ̆ hăng pran pơsit mơng mơnuih apăn bruă tơhan, ling tơhan pơgang guai lŏn ia hrom hăng tơlơi gum tơngan hrom mơng gong gai hăng mơnuih ƀôn sang pơgang guai lŏn ia tơring čar Daklak dưi djă pioh kơjăp tơlơi dưi pô./.

            Tuấn Anh: Čih – Siu H’ Prăk: Pơblang