VOV4.Jarai - Sang bruă prăk jar kmar (WB) ƀơi Việt Nam hơmâo pơphun mông lăi pơthâo hră pơhing čih glăi bruă bơwih ƀong huă ƀơi Việt Nam hơmâo čoh amăng blan 8 thun 2022 hăng anăn “Pơtô pơjuăt kiăng pơđĭ kyar”. Hră pơhing lăi nao hơdôm tơlơi pơplih phrâo anai hloh amăng bơwih ƀong huă ƀơi Việt Nam, hơdôm tơlơi him lăng hlâo kơ rơnoh pơđĭ kyar ƀiă thun pơ anăp hăng gap ƀrô amăng bơwih ƀong huă kah hăng hơdôm tơlơi pơsit tong kơ tơlơi lông amăng lŏn ia hăng gah rơngiao bơdjơ̆ nao bruă pơđĭ kyar ƀơi dêh čar Việt Nam. Hră pơhing lăi pơthâo anai ăt pơsit tong, thun blan hơkrŭ glăi bơwih ƀong huă ƀơi Việt Nam hơmâo đĭ kơtang amăng 6 blan laih rơgao, yua hơdôm anih pơkra pơjing tŏ tui mă bruă hơđong hăng gơnong bruă bơwih bơwang hơkrŭ glăi kơtang. Yua anun, tui WB, GDP him lăng amra đĭ kơtang mơng 2,6% amăng thun 2021 đĭ 7,5% amăng thun 2022, bruă prăk kak rơngiă nua amra đĭ dưm dưm 3,8%. Ăt tui WB mơn, pơplih amăng bruă pơtô hrăm gah sang hră gưl prong lĕ akŏ phun kiăng hrưn đĭ amăng bơwih ƀong, pơkra pơjing mơng Việt Nam hăng djru ngă pơgiong tui hơnong pơkă jing dêh čar pơhrui rĭm akŏ mơnuih lu ƀiă truh thun 2035 hăng dêh čar pơhrui lu amăng thun 2045.

Siu Đoan: Pơblang